ABŞ Prezidenti Donald Tramp bəyan edib ki, Qətərin hədiyyə etməyi planlaşdırdığı Boeing-747-8 təyyarəsi şəxsən ona yox, ABŞ Hərbi Hava Qüvvələrinə təhvil veriləcək.
Bizim.Media “İnterfaks”a istinadən xəbər verir ki, Tramp bu barədə Truth Social sosial şəbəkəsində yazıb:
“Boeing-747 ABŞ Müdafiə Nazirliyinə, Hərbi Hava Qüvvələrinə verilir, şəxsən mənə yox!”, – deyə Tramp qeyd edib.
O, vurğulayıb ki, bu, ABŞ-ın uzun illər uğurla qoruduğu bir dövlətdən gələn hədiyyədir.
“Bu təyyarə hökumətimiz tərəfindən, yeni Boeing-lər çatana qədər, müvəqqəti olaraq Hərbi Hava Qüvvələrinin təyyarəsi kimi istifadə olunacaq. Yeni təyyarələrin tədarükü ciddi gecikmələrlə üzləşib”, – deyə ABŞ Prezidenti əlavə edib.
Trampın fikrincə, ABŞ hərbçiləri və vergi ödəyiciləri üçün, əgər belə bir təyyarəni dost ölkə pulsuz verirsə, ona milyonlarla dollar xərcləməyə ehtiyac yoxdur.
“Bu, ABŞ-ın yaxşı işinə görə verilən təşəkkürdür”, – deyə Tramp bildirib.
Bizim.Media
