BAKI, 8 may. TELEQRAF
Papa özünə hansı adı seçirsə, bu, onun pontifikatına dair mesaj xarakteri daşıya bilər.
Teleqraf xəbər verir ki, tarixdə papalar tərəfindən ən çox seçilən ad “İohann” olub. Bu ad Papa Fransiskin də xələfinə tövsiyə etdiyi adlardan biridir.
“İohann” adının seçilməsi 1960-cı illərin simvolik şəxsiyyətini yada sala bilər. XXIII İohann (1958–1963) ünsiyyətcil, daim gülümsəyən şəxsiyyət kimi tanınırdı.
O, Kuba Raket Böhranının həllində pərdəarxası diplomatik səylərlə iştirak etmiş, həmçinin Katolik kilsəsinin tarixində dönüş nöqtəsi sayılan İkinci Vatikan Şurasını çağırmışdı. Bu üç il davam edən toplantı dünyadakı katolik yepiskoplarını bir araya gətirmiş və kilsədə mühüm islahatlara yol açmışdı.
“Paul” adının seçilməsi isə XXIII İohannın varisi, 1963–1978-ci illərdə papa olan VI Paulun xatirəsinə ehtiram göstəricisi ola bilər. O, daha ehtiyatlı və ölçülü siyasəti ilə tanınır, sələfinin başladığı bəzi islahatları möhkəmləndirmiş və kilsənin mövqeyini aydın şəkildə ifadə etmişdi.
1978-ci ildə papa seçilən kardinal Albino Luçani yalnız bir adla kifayətlənməyərək, özündən əvvəlki iki papanı şərəfləndirmək üçün “İohann Paul” adını götürüb.
Luçani cəmi 33 gündən sonra vəfat etdikdə, onun varisi kardinal Karol Voytila “İohann Paul II” adını seçdi və bununla son üç papanın xatirəsinə ehtiram bildirdi.
Yeni papa da ikiqat ad seçə bilər. Məsələn, “İohann Fransisk” adı həm 1960-cı illərin islahatlarını, həm də Papa Fransiskin qlobal nüfuzunu simvolizə edə bilər.
