Polşa bildirib ki, ölkə mayın 18-də keçiriləcək prezident seçkilərinə Rusiyanın misli görünməmiş müdaxilə cəhdi ilə üzləşib.
HİT.az xəbər verir ki, bu bəyanatla Rəqəmsal Texnologiyalar naziri Kşiştof Qavkovski çıxış edib.
Qavkovski qeyd edib ki, Polşanın Ukraynaya yardım mərkəzi kimi rolu onu Rusiyanın təxribatı, kiberhücumları və dezinformasiya üçün əsas hədəfə çevirib. Onun sözlərinə görə, xüsusilə Rumıniyada dekabrda keçirilən prezident seçkiləri Rusiyanın müdaxiləsi səbəbindən ləğv edildikdən sonra Varşava müdaxilə üçün yüksək hazırlıq vəziyyətindədir.
"Polşada bu il keçirilən prezident seçkiləri zamanı biz Rusiya tərəfdən seçki prosesinə görünməmiş müdaxilə cəhdi ilə üzləşdik. Bu, dövlətin normal fəaliyyətini iflic etmək məqsədilə Polşanın kritik infrastrukturuna hibrid hücumlarla birləşən dezinformasiyanın yayılması ilə həyata keçirilir", deyə Qavkovski müdafiə konfransında bildirib.
Polşanın rəqəmsal işlər naziri su təchizatı və kanalizasiya şirkətlərinə, istilik elektrik stansiyalarına və dövlət idarəetmə orqanlarına hücum edildiyinə aydınlıq gətirib. O, Polşada kiberhücumlar baxımından Rusiyanın aktivliyinin 2024-cü illə müqayisədə iki dəfədən çox artdığını vurğulayıb.
"Bu gün Polşada mənim çıxışımın hər dəqiqəsi üçün mühüm infrastrukturu hədəf alan onlarla insident qeydə alınıb", deyə Qavkovski əlavə edib.
Bundan əvvəl Polşanın baş naziri Donald Tusk Varşava meri Rafal Trzaskoskinin hakim Vətəndaş Koalisiyası partiyasından Polşa prezidentliyinə namizəd olduğunu açıqlamışdı. Praymerizin nəticələrinə görə, o, 74,75%, rəqibi xarici işlər naziri Radoslav Şikorski isə 25,25% səs toplayıb. Öz növbəsində Şikorski praymerizdə ona səs verən hər kəsi "şərtsiz Rafal Trzaskovskini dəstəkləməyə" çağırıb.
Samir
