Ötən gün səfərdə “Sumqayıt”la qarşılaşmış “Neftçi” futbol üzrə Azərbaycan çempionatlarında 1600-cü qolunu vurub.
Arena.az xəbər verir ki, paytaxt təmsilçisinin yubiley topuna Andrey Ştoqrin imza atıb.
O, Azərbaycan Premyer Liqasının 32-ci turunun “Sumqayıt”la səfər oyununda (2:2) komandasını məğlubiyyətdən xilas edən sonuncu qolun müəllifi olub. Bakı klubu 1992-ci ildən keçirilən ölkə çempionatlarındakı 1600-cü qolu 957-ci oyununda vurub.
“Ağ-qaralar”ın orta məhsuldarlığı 1,67-yə bərabərdir. Paytaxt təmsilçisi evdə 923, səfərdə 657, neytral meydanda 20 qola sevinib.
“Neftçi” yarışın tarixində 1600 və ya daha çox qol vuran 2-ci komandadır. “Qarabağ”ın hesabında 1606 qol var.
Qeyd edək ki, paytaxt klubu milli çempionatlarda ilk qolunu Sumqayıtın digər təmsilçisi “Xəzər”lə görüşdə 1992-ci il mayın 8-də vurub. Tarixi topa Yunis Hüseynov imza atıb.
