Fransanın nüfuzlu “Le Monde” nəşri Hindistanın Pakistan ərazisində həyata keçirdiyi “Sindoor Əməliyyatı”nın Hindistan Hərbi Hava Qüvvələrinin (HHQ) zəif tərəflərini üzə çıxardığını yazıb.
KONKRET.az xəbər verir ki, nəşrin məlumatına görə, Hindistan əməliyyat zamanı ən azı üç döyüş təyyarəsini itirib. Bu təyyarələrdən birinin Fransanın istehsalı olan Rafale olduğu bildirilir ki, bu da bu modelin ilk döyüş itkisi hesab olunur.
Əməliyyat çərçivəsində Hindistan HHQ-nin Rafale, MiG-29 və Su-30MKI tipli təyyarələri SCALP-EG qanadlı raketləri və GBU-24 idarə olunan bombalarla təchiz olunaraq Pakistanın Bahavalpur, Muridke və Muzzəffərabad şəhərlərində yerləşən doqquz hədəfi vurub. Hindistan bu hədəflərin terrorçu qruplaşmaların infrastrukturu olduğunu iddia etsə də, Pakistan bu yerlərin mülki obyektlər olduğunu və nəticədə 31 mülki şəxsin həlak olduğunu bildirib.
Pakistan ordusu Hindistana məxsus beş təyyarəni – üç Rafale, bir Su-30MKI və bir MiG-29-u vurduğunu açıqlayıb. Hindistan isə yalnız üç təyyarənin itirildiyini təsdiqləyib. Bu hadisələr Hindistanın hava üstünlüyü iddialarına ciddi zərbə vurub və ölkənin hava qüvvələrinin müasir döyüş şəraitindəki effektivliyi ilə bağlı suallar yaradıb.
Hindistanın Rafale təyyarələri ilə bağlı bu itkilər, xüsusilə də bu modelin ilk döyüş itkisi olması, ölkənin hava qüvvələrinin modernləşdirilməsi və gələcəkdə beşinci nəsil döyüş təyyarələrinin əldə edilməsi planlarını daha da aktuallaşdırır. Bu kontekstdə, Hindistanın AMCA (Advanced Medium Combat Aircraft) layihəsi və digər strateji təşəbbüsləri ön plana çıxır.
Natiq Səlim,
KONKRET.az
