Heydər Əliyev şəxsiyyəti hər bir azərbaycanlı üçün müdriklik, əzmkarlıq və vətənə sədaqət rəmzidir.
Manset.az xəbər verir ki, bunu Milli Məclisin sədri Sahibə Qafarova parlamentin bu gün keçirilən xüsusi iclasında deyib.
O qeyd edib ki, Ulu Öndərin Azərbaycan xalqı qarşısında ən böyük xidmətlərindən biri müstəqil Azərbaycanın ilk konstitusiyasının hazırlanmasıdır:
“1995-ci ildə qəbul edilən ali sənəd dünyanın ən demokratik konstitusiyaları ilə müqayisə oluna bilər. Ulu Öndərin başlatdığı işləri layiqincə davam etdirən Prezident İlham Əliyevin rəhbərliyi ilə Azərbaycanın uğurları misilsiz tarixi qələbələri ilə davam etdirilib. Azərbaycan hazırda Avrasiyanın önəmli energetika mərkəzinə çevrilib. Müxtəlif sahələrə böyük investisiyalar qoyulub. Ölkəmiz Qoşulmama Hərəkatı və digər beynəlxalq təşkilatlarda mövqeyini gücləndirib, sammit və beynəlxalq tədbirlərin keçirildiyi məkana çevrilib.
Bu gün biz azad Qarabağda quruculuq-bərpa işlərinin şahidi oluruq. Azərbaycanlılar vandalizm qalıqlarını gülüstana çevirərək qurucu xalq olduqlarını dünyaya nümayiş etdirirlər. Azərbaycan dinamik inkişaf yolu ilə davam edərək yeni tarixi qələbələrə imza atacaq".
Daha sonra Milli Məclisin Aparatı tərəfindən hazırlanan "Konstitusiya və Suverenlik İli"nə həsr edilmiş sənədli film nümayiş etdirilib.
