Dağıstanın Kizlyar şəhərində mağazanın açılışında həyata keçirilən endirim kampaniyası böyük izdiham və davaya səbəb olub. İdman geyimlərinin 99 rubla, ayaqqabıların isə 500 rubla satıldığını öyrənən yüzlərlə insan səhər saatlarında mağazanın qarşısına toplaşıb. Camaat nəzarətsiz şəkildə qapıya sıxışdıqda dava düşüb və bəzi müştərilər xəsarət alıb.
Hafta.az-ın yerli mətbuata istinadən yazdığına görə, izdiham o qədər böyük olub ki, içəri ilk girənlərdən biri - azyaşlı uşaq başından vurularaq yerə yıxılıb.
Qapılar açılanda içəridəki mənzərə daha da xaotikləşib. Müştərilər əllərinə düşən hər şeyi rəflərdən süpürüblər, hətta satışda olmayan bəzək əşyaları və içki şkafı əşyaları da götürülüb. Onlayn platformalarda paylaşılan görüntülərdə insanların qışqırıq və çaxnaşma hökm sürdüyü mağazaya girmək üçün bir-birini itələdiyi görünür. Mağaza işçilərinin idarəetməni tamamilə itirdiyi hadisədə stendlər, rəflər və asılqanlar sıradan çıxıb.
Hadisə sosial mediada böyük əks-səda doğurub. İstifadəçilər “Belə ucuz məhsullara dəyərmi?”, “Çoxluq varmış kimi hücuma keçdilər”, “Bu artıq endirim deyil, talançılıqdır!” şərhlər verib. Hələlik hadisə ilə bağlı rəsmi qurumlardan heç bir açıqlama verilməyib, izdihamda neçə nəfərin xəsarət aldığı və dəymiş maddi ziyanın həcmi bəlli deyil. Yerlilərin baş verənlərə reaksiyası isə bölünüb: bəziləri yoxsulluğun bu mənzərələrə səbəb olduğunu, digərləri isə sadəcə hörmət və nəzakətin itirildiyini deyib.
