"Dünya Qəzzadakı qırğınlara və humanitar fəlakətə səssizcə tamaşa edir..."
Fələstin milli iqtisadiyyat naziri Məhəmməd əl-Amur Bağdadda bəyan edib ki, müharibə başa çatdıqdan sonra Fələstinin normal həyata qayıtması üçün 15 il lazım olacaq.
Moderator.az xəbər verir ki, bu barədə İraq Xəbər Agentliyi məlumat yayıb. Məlumatı "TASS" agentliyi yayıb.
Məlumatda deyilir ki, nazir bu barədə ərəbdilli ölkələrin təşkilatı olan Ərəb Dövlətləri Liqasının 34-cü panərəb sammiti ərəfəsində keçirilən iqtisadi və sosial məsələlər üzrə Şurasının iclasında çıxışında bəyan edib.
"İsraillə müharibə başa çatdıqdan sonra normal həyata dönmək üçün bizə 15 il lazım olacaq", - əl-Amur vurğulayıb. "Mövcud vəziyyətə baxmayaraq, fələstinlilər dəyanət nümayiş etdirir. Bizim xalq, işğal nə qədər davam etsə də, məğlub olmayacaq".
"Qəzza soyqırıma məruz qalır. Minlərlə humanitar yardım olan yük maşını İsrail tərəfindən bölgəyə buraxılmır. Dünya isə Qəzzadakı qırğınlara səssizcə tamaşa edir", - o, əlavə edib.
Daha sonra o, Fələstin Muxtariyyətinin inzibati nəzarətində olan İudiya və Samariyada (İordan çayının Qərb sahili) yerləşən ərəb yaşayış məntəqələri barədə danışıb: "İordan çayının Qərb sahilində mindən çox israilli nəzarət-buraxılış məntəqəsi yerləşir və bu da iqtisadiyyatı məhv edir", - nazir qeyd edib. Onun sözlərinə görə, "işsizlik səviyyəsi Qərb sahili və Qəzza bölgəsində 51 faizə çatır".
2025-ci il martın 2-dən etibarən İsrailin qərarı ilə Qəzza bölgəsinə humanitar yardım daxil olmur və bütün nəzarət-buraxılış məntəqələri bağlı qalır.
Martın 18-də İsrail ordusu Qəzza bölgəsində hərbi əməliyyatlara yenidən başlayıb, bölgəyə genişmiqyaslı zərbələr endirib və bununla da yanvar ayında qüvvəyə minmiş atəşkəs rejimini pozub.
Baş nazir Benyamin Netanyahuya məxsus Baş Nazirlik Aparatı bu qərarın HƏMAS-ın vasitəçilər və ABŞ prezidenti Donald Trampın xüsusi nümayəndəsi Stiven Uitkoff tərəfindən təqdim olunan təklifləri rədd etməsi ilə əlaqədar olduğunu açıqlayıb.
Bildirilib ki, əməliyyatın məqsədi bütün girovların azad olunmasıdır. Radikal qruplar isə hərbi əməliyyatların yenidən başlanmasına görə məsuliyyəti İsrail və ABŞ-ın üzərinə atıb.
Ərəb Dövlətləri Liqasının 34-cü sammiti mayın 17-də Bağdadda keçirilməsi planlaşdırılır. Məhəmməd əl-Amur təsdiqləyib ki, Fələstin Muxtariyyəti sammitdə ən yüksək səviyyədə təmsil olunacaq və nümayəndə heyətinə Mahmud Abbas rəhbərlik edəcək.
