PUA hücumları ilə bağlı Moskva hava limanlarının bağlanması səbəbindən Rusiyanın digər hava limanlarında gecikmələr yaşanır. Onlarla təyyarə havaya qalxmaq üçün növbə gözləyir və sərnişinlər kütləvi şəkildə təyyarələrdə saxlandıqlarını bildirirlər.
Axar.az xəbər verir ki, bu barədə “Baza” Teleqram kanalı məlumat yayıb.
Məlumata görə, Mahaçqaladan Moskvaya uçmalı olan “Pobeda” şirkətinə məxsus təyayrə 13 saatdır gözləyir. Bundan əvvəl həmin reys dünən 19 saat gözlədikdən sonra Moskvaya uçub, lakin geri qayıtmağa məcbur olub. Sərnişinlərin sözlərinə görə, aviaşirkət onlara otel xidməti təklif etməyib, yemək isə yalnız bu gün səhər gətirilib.
Sankt-Peterburqun Pulkovo hava limanına enən “Emirates Airlines” aviaşirkətinin Dubay-Domodedovo reysinin sərnişinlərinə 6 saat ərzində təyyarəni tərk etməyə icazə verilməyib, sonra isə sadəcə olaraq Moskvaya təkbaşına çatmaq təklif edilib.
Sərnişinlərin sözlərinə görə, çoxları o qədər beziblər ki, aviaşirkət nümayəndələrinə qarşı belə heç bir tələb irəli sürmək də istəməyiblər.
“Peqasus” Hava Yollarının Antalya-Moskva reysi ilə uçan sərnişinləri də oxşar vəziyyətlə üzləşiblər. Onların təyyarəsi də Pulkovoya enib və sərnişinlərin dediyinə görə, onlar mal-qara kimi 7 saat təyyarələrdə saxlanılıblar.
Özbəkistan Hava Yollarının Daşkənd-Moskva və “Aeroflot”un Çelyabinsk-Moskva reysi ilə uçan sərnişinləri də təyyarədə gecələyiblər. 7 saatlıq gözləmədən sonra nəhayət ki, insanlara təyyarələri tərk edərək hava limanına getməyə icazə verilib.
“Ural” Hava Yollarının Səmərqənd-Moskva reysi ilə uçan təyyarəni Jukovski hava limanı qəbul etməyib və təyyarə Samarada eniş edib. Təyyarədə 4,5 saat gözlədikdən sonra sərnişinlər hava limanına buraxılsalar da, otellə təmin olunmayıblar. Sərnişinlərin dediyinə görə, onlara bütün otellərin dolu olduğu bildirilib.
