T.Rzayev bu səfərin Azərbaycanın əleyhinə, yoxsa lehinə olacağı məsələsinə də aydınlıq gətirib: “İran əgər həm Azərbaycan, həm də Ermənistanla eyni əlaqələr saxlayıb neytral mövqe tutursa, bu, bizim üçün qəbul ediləndir. Biz İrandan, əlbəttə ki, bir müsəlman, dost və tarixi əlaqələri olan ölkə kimi, daha çox Azərbaycan tərəfini, Qarabağın işğaldan azad olunmasını dəstəkləməsini gözləmişik. Artıq Qarabağ işğaldan azad olunub, İran da bunu məcburi şəkildə tanıyıb. Bundan sonra İranın həm Azərbaycan, həm də İrəvanla balans saxlaması vacibdir. Əgər Pezeşkianın İrana səfəri zamanı Azərbaycanla bağlı müsbət açıqlamalar səslənsə, bu, normal qarşılanar. Amma sadəcə Ermənistanla münasibətləri qabardılsa, bu, onu göstərər ki, İran yenə də Ermənistana Azərbaycandan daha çox dəstək verir və daha yaxın münasibət saxlayır”. T.Rzayev İranın Ermənistanın logistik və hərbi təhlükəsizliyində, silah təchizatında xüsusi rol oynadığını da vurğulayıb: “Belə olan halda, İranın burada sülh nöqteyi-nəzərindən iki tərəfin barışığına çalışması müsbət hal olardı. Ancaq əgər, həqiqətən, İran hər iki tərəfdə səmimi şəkildə sülh istəsə, bunun üçün hər iki tərəfə çağırış etməli, hətta müəyyən qədər təzyiq göstərməlidir. İran yalnız Ermənistana dəstək verib, Azərbaycanla münasibətləri sadəcə formal şəkildə davam etdirməyə çalışsa, balansı pozsa, bu, İranın sülh istəklərinin və vasitəçi rolunun uğurla nəticələnməsinə imkan verməyəcək. Əgər Ermənistan bu dəstəyi hiss edərsə, faktiki olaraq silahlanmasını sürətlə davam etdirəcək. Bu silahlanma İran üzərindən həyata keçiriləcəksə, Ermənistan İranın dəstəyini arxasında hiss edib, bölgədə sabitliyi pozacaq. Düşünürəm ki, İran Ermənistanın əsas logistik qapısı rolunu oynayır. Əgər İran Ermənistana açıq şəkildə izah etsə ki, sülh prosesindən uzaqlaşacağı təqdirdə bu dəstək azaldıla bilər, bu, Ermənistan üzərində müsbət təzyiq yaratmış olardı”.Sevinc İbrahimzadə / Metbuat.az
