Brüssel Azad Universitetinin və digər aparıcı institutların belçikalı alimləri müəyyən ediblər ki, müasir uşaqlar həyatları boyu nənə və babaları ilə müqayisədə bir neçə dəfə daha çox iqlim kataklizmləri yaşayacaqlar.
Redaktor.az xəbər verir ki, araşdırma "Nature" elmi jurnalında dərc olunub.
Komanda 5-18 yaş arası 1,69 milyard gənc haqqında məlumatları təhlil edib.
Nəticələr göstərib ki, hətta optimist ssenaridə (+1,5°C) 2020-ci ildə doğulan uşaqların 52%-i əvvəlki nəsillərin yaşamadığı həddindən artıq isti ilə üzləşəcək. Üstəlik, 1960-cı il təvəllüdlü insanların həyatı boyu istilik dalğaları, daşqınlar və digər hava fəlakətləri 2-7 dəfə daha çox baş verəcəkdir.
Mövcud iqlim siyasəti ilə (+2,7°C) bu rəqəm 90%-ə yüksələcək.
"Bu o deməkdir ki, 1,5 milyard uşaq anormal istiyə məruz qalacaq. Sənayedən əvvəlki dövrlərdə bu cür risklər 0,01%-dən az olardı", - deyə tədqiqatın aparıcı müəllifi Dr Luke Grant izah edib.
Tədqiqatçılar təcili tədbirlərin riskləri yarıya qədər azalda biləcəyini vurğulayırlar. +1,5°C ssenari üzrə aclıq riski altında olan uşaqların sayı 400 milyondan 316 milyona düşəcək, 25 milyon daha az uşaq meşə yanğınları riski altında olacaq və fəlakətli quraqlıqların tezliyi 20% azalacaq.
Alimlər bu məlumatların bəşəriyyət üçün "qırmızı kod" kimi qəbul edilməsini tələb edirlər. Onların hesablamalarına görə, 2030-cu ilə qədər emissiyalar 45% azalmasa, planet artıq 2030-cu illərin əvvəllərində +1,5°C ölümcül həddi keçəcək.
Turan İSMAYIL
