Çexiyada fırtına zamanı ağacın altında gözləyən iki alman turisti ildırım vurması nəticəsində yaralanıb. Həftə sonu Çexiyanın “Böhmische Schweiz” (Bohemiya İsveçrəsi) bölgəsində şiddətli fırtına zamanı ildırım vurması nəticəsində iki alman turist yaralanıb. Hadisə baş verən zaman cütlük “Tyssaer Wände” (Tissa Divarları) kimi tanınan qayalıq ərazidə gəzintiyə çıxıbmış.
Şənbə günü günortadan sonra Almaniya sərhədi yaxınlığında başlayan qəfil fırtına zamanı turist cütlüyün ağacın altına sığınaraq özlərini qorumağa çalışdıqları öyrənilib. Lakin bu müddət ərzində ildırım vurması nəticəsində xəsarət alıblar. Alman cütlüyü Tisa və Rajec kəndləri arasında başqa bir alman qrupu tapıb. Qrup yaralıları “Am Kreuz” adlanan istirahət məntəqəsinə aparıb və yardım çağırıb.
Hadisə yerinə gələn Çexiya dağ-xilasetmə qrupu və tibb işçiləri yaralıların çaşqınlıq içində olduqlarını bildiriblər. “Bizim ilkin müayinəmiz zamanı hər iki turistin sinə nahiyəsində yanıqlar aşkar etdik. Onların paltarlarındakı yanıq dəlikləri açıq-aydın ildırım vurduğunu göstərirdi”, – regional dağ-xilasetmə bölməsinin rəhbəri Miroslav Raçko bildirib. Raçko həmçinin kişi turistin üzündə şiddətli ağrılar və bir gözündə görmə qabiliyyətinin itirildiyini söylədi. Yaralılar iki təcili yardım maşını ilə təxminən 15 kilometr uzaqlıqdakı Usti nad Labem xəstəxanasına aparılıb.
“Turistlərdən biri ağır, digəri isə orta dərəcəli xəsarətlərlə xəstəxanaya aparılıb”, - səhiyyə xidmətinin sözçüsü Prokop Volenik bildirib.
