"OpenAI" 3 milyard dollara "Windsurf" startapını almağa razılaşıb.
Valyuta.az xəbər verir ki, süni intellektlə dəstəklənən kodlaşdırma alətinin alınması "OpenAI" tarixində ən böyük alış olacaq.
"ChatGPT" platformasının yaradıcıları olan "OpenAI" şirkəti süni intellekt əsaslı kodlaşdırma yardımçısı "Windsurf"ü (əvvəllər "Codeium" kimi tanınırdı) təxminən 3 milyard dollar müqabilində satın almaq barədə razılıq əldə edib. Bu, şirkətin indiyə qədərki ən böyük satınalması sayılır.
Mənbələrin bildirdiyinə görə, bu razılaşma hələlik rəsmi şəkildə bağlanmayıb və danışıqlar məxfiliyi qorunmaq şərti ilə aparılır. Nə "OpenAI", nə də "Windsurf" ictimaiyyətə bu barədə açıqlama verib.
Sözügedən satınalma "OpenAI"ın süni intellekt dəstəkli kodlaşdırma bazarında artan rəqabətlə üzləşdiyi bir vaxtda baş tutur. Bu kateqoriyaya daxil olan texnologiyalar təbii dildə verilmiş komandalardan proqram kodu yarada bilir və tərtibatçılar üçün prosesi xeyli sürətləndirir.
Məlumata görə, "Windsurf" rəsmi adı ilə "Exafunction Inc" son zamanlar "Kleiner Perkins" və "General Catalyst" kimi iri investorlarla 3 milyard dollarlıq qiymətləndirmə əsasında yeni maliyyə raundu üzrə danışıqlar aparırdı. Şirkət ötən il "General Catalyst"in rəhbərlik etdiyi investisiya raundu çərçivəsində 1,25 milyard dollar dəyərləndirmə ilə sərmayə toplamışdı.
"OpenAI"ın rəqibləri arasında "Anthropic" və "Microsoft"a məxsus "GitHub" da var. Bu platformalar da tərtibatçılar üçün süni intellekt əsaslı alətlər təklif edir. Eyni zamanda "Cursor" adlı aləti təqdim edən "Anysphere" kimi yeni nəsil startaplara da investorlar tərəfindən böyük maraq göstərilir.
"OpenAI" ötən həftə "SoftBank Group Corp"un rəhbərlik etdiyi 40 milyard dollarlıq maliyyələşməni tamamlayıb. Bu investisiya şirkətin dəyərini 300 milyard dollara çatdırıb. Bazar ertəsi "OpenAI" şirkət strukturunu daha klassik kommersiya modelinə çevirmə planlarından imtina etdiyini açıqlayıb. Bu qərar ictimaiyyətin ciddi tənqidindən sonra verilib.
Sərvanə Rəmixanova
