Mil-Muğan bölgəsində son günlər havaların qeyri-sabit keçməsi meyvə bağlarına təsirsiz ötüşməyib. Əsasən də yağan yağışlar ağaclarda çiçəklənməyə mənfi təsir edib.
FED.az iqtisadi xəbərlər agentliyinin məlumatına görə, Mil-Muğan bölgəsində yerləşən İmişli rayonunda meyvə bağlarının çox hissəsi əsasən fərdi təsərrüfatlarda, yəni həyətyanı sahələrdədir. Yağan yağışlar səbəbindən bağlardan məhsul gözləntisi aşağı düşüb. Qeyri-sabit hava əsasən ərik və gilas ağaclarına təsir edib.
İmişlidən olan bağban Muxtar Əliməmmədov əvvəlki illərə nisbətən məhsuldarlığın iki dəfə az olacağını bildirir: “İstənilən qədər gilas olmayacaq. Çünki yağış çox təsir edib. Yağışlar ağac çiçəkləyən dövrdə düşdüyü üçün çiçəklər zədələnib tökülür. Bəzi ağaclarda çiçək qalsa da, bir çoxunda ümumiyyətlə heç yoxdur. Ötən il bu ağaclar 15-18 kiloqram məhsul verib. Lakin bu dəfə yağışın fəsadları səbəbindən hər ağac 5-6 kiloqramdan artıq məhsul verə bilməyəcək”.
Aramsız yağan yağışlar həm də zərərvericilərin və müxtəlif xəstəliklərin artmasına səbəb olub. Əsasən də ağacın dibinin nəmli qalması bu prosesi sürətləndirib. Yağış alaq otlarının inkişafına, eləcə də artan qrunt suları ağacların qurumasına səbəb olur.
Hazırda bağbanlar ziyanvericilərə və xəstəliklərə qarşı mübarizə apararaq zərəri minimuma endirməyə çalışırlar. Aqronom-bağban Azər Rzayev deyir ki, ağaclarda əsasən yarpaqaltı bitlərə rast gəlinir, bu da çox təhlükəlidir.
"Zərərvericilər daha çox ağaclara ziyan verir və “meyvə gözləri”ni yeyərək yandırır. Bu da ağaclarda meyvənin az olmasına gətirib çıxarır. “Miz” dediyimiz həşəratlara qarşı və alçanın içqurduna qarşı mübarizə aparırıq. Bu dərmanlama aparılmasa, meyvəyə içqurdu düşür, yağışlardan sonra meyvədə saralma baş verir və tökülür. Qrunt suları yüksələn yerlərdə isə məsləhət görülür ki, bağın ətrafında drenaj quyuları qazılsın, qrunt suları oraya axsın. Bu sistemi qurduqdan sonra daha yaxşı nəticə almaq olmur və ağaclar üçün yaranan təhlükəyə qarşı yaxşı mübarizə üsuludur", - deyə o əlavə edib (Azərtac).
Qeyd edək ki, Azərbaycanda tətbiq edilən aqrar sığorta mexanizmi meyvə bağlarını çoxsaylı risklərdən qoruyur. Bununla yanaşı bəzi meyvələri, o cümlədən gilası güclü yağışın – leysanın vurduğu zərərdən də sığortalamaq mümkündür.
FED.az-ın məlumatına görə, İmişli rayonun yerləşdiyi Mil Muğan regionunda 1000 manatlıq gilas meyvəsinin baza zərfi ilə yanaşı, yağmır (leysan) riskindəndə sığortalamaq fermerə təqribən 50 manata başa gəlir. Fermer gilas bağını leysan riskin olmadan, yəni baza zərfi ilə sığortalamaq istədikdə isə 1000 manatlıq məhsulun sığortalanması ona cəmi 18 manata başa gələcək.
