Səfir: "Hərbçilərimiz ilk dəfə Qırmızı meydanda ərazilərini və suverenliyini bərpa etmiş Azərbaycanı təmsil edəcəklər”.
Azərbaycanın Rusiyadakı səfiri Rəhman Mustafayev 2025-ci il mayın 5-də 9 May Qələbə Paradında iştirak etmək üçün Moskvaya gəlmiş Azərbaycan Silahlı Qüvvələrinin hərbi qulluqçuları ilə görüş keçirib.
APA-nın Moskva müxbiri xəbər verir ki, görüşdə səfir Rəhman Mustafayev çıxış edərək, azərbaycanlı hərbçilərin İkinci Dünya müharibəsində Qələbənin 80 illiyinə həsr olunmuş paradda iştirakın bu savaşda həlak olmuş azərbaycanlı döyüşçülərin xatirəsinə ehtiram kimi qiymətləndirib və hərbçilərimizin bu mühüm beynəlxalq tədbirdə ölkəmizi layiqincə təmsil edəcəklərinə əminlik ifadə edib.
Səfir çıxışında qeyd edib ki, İkinci Dünya müharibəsi və Vətən müharibəsində qələbə Azərbaycan xalqı üçün həm qürur mənbəyidir, həm də milli yaddaşın əsas sütunlarındandır.
Diplomat İkinci Qarabağ müharibəsində qələbəmizdən danışıb: "Siz hərbiçilər reallığı dəyişdirdiniz. Müzəffər Ali Baş Komandanımız İlham Əliyevin rəhbərliyi ilə Azərbaycan Ordusu yüksək peşəkarlıq və dəqiqlik göstərərək ərazilərimizi azad etdi”.
R.Mustafayev vurğulayıb ki, Azərbaycan öz balanslaşdırılmış xarici siyasəti ilə regionda sabitliyə mühüm töhfə verir. “Biz bütün qonşularımızla, o cümlədən Rusiya Federasiyası ilə dostluq və strateji tərəfdaşlıq prinsipləri əsasında əməkdaşlıq edirik. Rusiya Azərbaycan üçün müttəfiq dövlətdir və bu gün dünya dəyişdiyi bir vaxtda belə əlaqələrin əhəmiyyəti daha da artır”.
Səfir hərbi qulluqçulara müraciətlə bildirib: “9 Mayda Qırmızı Meydanda Azərbaycan bayrağını aparmaq sizə nəsib olub. Bu, təkcə parad deyil, bu, bizim tariximizi, müstəqilliyimizi və qələbəmizi bütün dünyaya göstərmək fürsətidir. Hərbçilərimiz ilk dəfə Qırmızı meydanda ərazilərini və suverenliyini bərpa etmiş Azərbaycanı təmsil edəcəklər”.
Görüşdə çıxış edən Azərbaycanın Rusiyadakı hərbi attaşesi Kənan Təhməzov isə qeyd edib ki, müstəqil ölkənin qarantı güclü silahlı qüvvələridir. “Azərbaycan Ordusu regionun ən güclü ordularından biridir. 2016-cı ilin aprel döyüşlərindən başlayan döyüş yolumuz 2020-ci ilin 44 günlük müharibəsi ilə davam etdi və 2023-cü ildə Qarabağ məsələsinə son nöqtə qoyuldu. Bu gün siz Qələbə Ordusunun təmsilçiləri kimi Moskvadasınız”, - deyə o bildirib.
Hərbi attaşe əlavə edib ki, Prezident, Ali Baş Komandan İlham Əliyevin daim diqqət və qayğısı nəticəsində Silahlı Qüvvələrimiz yüksək peşəkarlıq nümayiş etdirir. Rusiya Federasiyasındakı səfirliyimizin təşəbbüsü ilə keçirilən bu görüş bir daha göstərir ki, Azərbaycan dövləti hərbçilərinə dəyər verir və onların təmsilçiliyini hər zaman yüksək qiymətləndirir.
Görüş səmimi və vətənpərvər ruhda keçib, iştirakçılar Qələbə paradında iştirak etməyin məsuliyyəti və fəxarətini dərk etdiklərini ifadə ediblər.
