ABŞ-dan imtina Ukraynanın mövqelərini zəiflədir
Rusiya Elmlər Akademiyasının Təhlükəsizlik Problemləri Mərkəzinin elmi işçisi, amerikaşünas politoloq Konstantin Bloxin bildirib ki, ABŞ-ın vasitəçilikdən imtinası Ukraynanın vəziyyətini xeyli zəiflədəcək, çünki Qərb yardımlarının yarısı məhz ABŞ-dan gəlirdi.
Onun sözlərinə görə, Ukrayna artıq ABŞ-ı əsas tərəfdaş kimi görmür və daha çox Avropaya yönəlir. Kiyev və Brüsselin mövqeləri indi bir-birinə ABŞ ilə olan münasibətlərindən daha yaxındır.
Tramp münaqişənin həllini mümkünsüz sayır
Bloxin bildirib ki, ABŞ-ın bu qərarı prezident Donald Trampın münaqişənin həllini qeyri-mümkün sayması ilə bağlıdır. Onun fikrincə, Krım və digər ərazilərlə bağlı kompromiss yoxdur və bu məsələlər həll oluna bilməz.
Ukrayna ilə ABŞ 1 mayda təbii resurslara dair saziş imzalasa da, ekspertə görə, davam edən münaqişə şəraitində bu razılaşma gəlir gətirməyəcək. ABŞ "müharibədən heç nə əldə etmədən çıxır, necə ki, vaxtilə Əfqanıstandan çıxmışdı".
Bloxin əlavə edib ki, ABŞ üçün əsas prioritet indi Çin və İranı cilovlamaq, həmçinin İsrailə dəstək verməkdir. Buna görə də Vaşinqton Ukrayna münaqişəsində fəal rolunu dayandırır.
Ukrayna Avropaya ümid edir
Politoloqun sözlərinə görə, Ukrayna artıq ABŞ-ı əsas strateji tərəfdaş kimi görmür və Avropanı əsas maliyyə mənbəyi hesab edir. Kiyev və Avropa bir-birinə daha yaxındır.
Bloxin qeyd edir ki, Ukraynanın atəşkəsə əməl etməməsi və Rusiyaya hücumları, Kiyevin Moskva üçün məqbul olan şərtlərlə danışıqlara hazır olmadığını göstərir.
Bloxin sonda bildirib ki, ABŞ-ı başqa bir ölkənin əvəz etməsi vəziyyəti dəyişməyəcək. Çin, Türkiyə, BƏƏ və Səudiyyə Ərəbistanı vasitəçilik təklif etsələr də, əsas problem tərəflərin kompromisə hazır olmamasıdır.
"Yeni ölkələr və ya platformalar olsa belə, real irəliləyiş çətin görünür", - deyə ekspert bildirib.
