Milli Depozit Mərkəzi (MDM) növbəti illərdə kapital bazarında blokçeyn texnologiyası tətbiq edə bilər.
"Report" xəbər verir ki, bunu MDM-in Strategiya şöbəsinin rəhbəri Əli Əliyev Bakıda keçirilən "Depozitarın ekosistemdə rolu" mövzusunda tədbirdə bildirib.
Onun sözlərinə görə, qurumun hazırkı strategiyasında blokçeyn texnologiyalarının tətbiqi nəzərdə tutulmayıb: "Lakin gələcəkdə hazırkı strategiyanın icrasından sonra bu texnologiyanı nəzərə ala bilər".
O qeyd edib ki, blokçeynin texnologiya tərəfindən başqa qanunvericilik və pulların yuyulması məsələsi də var: "Odur ki, bu, həssas mövzudur. İlkin olaraq blokçeynin qanunvericilik bazası formalaşdırılmalıdır. Məsələn, hazırda Türkiyə və Rusiyada blokçeyn "exchange"ləri yaranıb və bu da investorlarda vəsait itkisinə səbəb olub. Bu səbəbdən də blokçeyn texnologiyasının tətbiqində növbəti illərdə "step-by-step" tətbiqinin daha məqsədə uyğun olduğunu düşünürəm".
