“Bayer”in baş məşqçisi, 43 yaşlı ispan mütəxəssis Xabi Alonso 2024/2025-ci illər mövsümünün sonunda “əczaçılar”dan ayrılacaq.
Arena.az xəbər verir ki, Alonso sonrakı gələcəyi ilə bağlı danışıb.
O, bu barədə sualı belə cavablayıb: “Mənim növbəti klubum? Gözləmək gərək olacaq. Bəyanat özünü çox gözlətməyəcək”, deyə ispan məşqçi vurğulayıb.
Qeyd edək ki, Alonsonun “Real”ın sükanı arxasınada 65 yaşlı italyan mütəxəssis Karlo Ançelottini əvəz edəcəyi haqda məlumat var. Bildirilir ki, ispan mütəxəssis “Real”la müddəti 2028-ci ilə qədər qüvvədə olacaq müqavilə razılaşdırıb. Razılaşma rəsmi bəyanat tarixini gözləyir. Alonso “kral klubu” ilə cari ilin iyun ayının 1-də müqavilə imzalayacaq və həmin ayda ABŞ-da başlayacaq FIFA Klub Dünya Kubokunda “qaymaqlılar”ı çalışdıracaq.
Xabi Alonso “Bayer”i 2022-ci ilin oktyabr ayından çalışdırır. İspan mütəxəssisin “əczaçılar”la müqaviləsinin müddəti 2026-cı ilin iyun ayının sonuna qədər qüvvədədir. “Bayer” 43 yaşlı Xabi Alonsonun məşqçilik karyerasında çalışdırdığı ilk yüksək səviyyəli klubdur. Buna qədər Alonso “Real” və “Real Sosyedad”ın müxtəlif alt sistemlərində çalışıb.
Xabi futbolçu karyerası ərzində “Real Sosyedad”, “Liverpul”, “Real” və “Bayern”də çıxış edib.
2023/2024-cü illər mövsümündə Alonsonun çalışdırdığı “Bayer” Almaniya Bundesliqasının qalibi olub. “Əczaçılar” həmçinin Almaniya Kubokunun finalında “Kayzerslautern”i 1:0 hesabı ilə məğlub edərək, ölkə kubokunu qazanıblar. Qitə miqyasında isə “Bayer” uğurla çıxış etdiyi Avropa Liqasının finalına yüksəlib və burada gözlənilmədən “Atalanta”ya 0:3 hesabı ilə məğlub olub.
“Bayer” Bundesliqada bütün mövsümü məğlubiyyətsiz başa vurmaqla, yarışın tarixində bir ilkə imza atıb. Beləliklə, “əczaçılar” XXI əsrdə Avropanın böyük futbol beşliyi milli birinciliklərinin komandaları arasında mövsümü məğlubiyyətsiz başa vurmuş 3-cü komanda kimi tarixə düşüblər. “Bayer”ə qədər müvafiq nailiyyətə “Arsenal” (2003/2004-cü illər mövsümü) və “Yuventus” (2011/2012-ci illər mövsümü) imza atıblar.
Həmçinin Alonsonun “Bayer”i 2023/2024 mövsümündə 51 oyundan ibarət məğlubiyyətsiz oyunlar silsiləsinə nail olub ki, bu da mütləq Avropa rekordudur.
2024/2025-ci illər mövsümündə Xabi “Bayer”ə Almaniya Super Kubokunu qazandırıb.
Xabi Alonso “Bayer”i ümumilikdə 138 oyuna çıxarıb, 89 qələbə, 31 heç-heçə, 18 məğlubiyyət yaşayıb. “Əczaçılar”ın top fərqi 311:149 nisbətindədir.
32 oyundan 68 xal toplamış “Bayer” Almaniya Bundesliqasının yarış cədvəlinin 2-ci pilləsində qərarlaşıb.
