“Hindistan tərəfindən həyata keçirilən, güc nümayişi kimi təqdim edilən bu hücum mülki infrastruktura, dini obyektlərə yönəlmiş qəddar bir addımdır. Bu hücum Cenevrə Konvensiyalarının açıq şəkildə pozulmasıdır. Çünki mülki ərazilərin, xüsusən də dini obyektlərin hədəf alınması beynəlxalq humanitar hüquqa ziddir. Bu cür hərəkətlər yalnız Pakistanın ərazi bütövlüyünü və suverenliyini pozmaqla kifayətlənmir, eyni zamanda BMT Nizamnaməsinin münaqişələrin sülh yolu ilə həllinə dair əsas prinsiplərinə və müharibə zamanı mülki şəxslərin qorunmasını nəzərdə tutan beynəlxalq humanitar hüququn fundamental prinsiplərinə qarşıdır”.Bu fikirləri Metbuat.az-a açıqlamasında Pakistanın qlobal sülh müdafiəçisi, "Kəmər və Yol Təşəbbüsü ilə Davamlı İnkişaf" (BRISD) təşkilatının sədri Qaiser Nawab deyib. O bildirib ki, Pakistan sülh istəyir, lakin suverenliyindən də imtina etməyəcək: “Bu hadisələr Cənubi Asiyanın çox ehtiyac duyduğu birgə rifah, davamlı inkişaf və regional əməkdaşlıq ideallarından nə qədər uzaq olduğumuzu göstərir. Hər bir hava hücumu, hər bir mülki itki və hər bir gərginlik bizi bu məqsədlərdən daha da uzaqlaşdırır. Bu, sadəcə ərazi münaqişəsi deyil, ticarət, ətraf mühitin pisləşməsi və regiondakı gənclərin hərəkətliliyi kimi sahələrdə də hiss olunur. Hindistanın Çenab çayı üzərindəki Bağlihar Su Anbarı vasitəsilə su axınını dayandırmaq qərarı Pakistanın cənub bölgələrində ətraf mühit və insan təhlükəsizliyini daha da ağırlaşdırır. Hidroloqların fikrincə, bu cür su kəsintiləri Pəncab və Sind əyalətlərində 5 milyon hektardan çox əkin sahəsinə su verilməsini çətinləşdirə və minlərlə fermerin dolanışığını təhlükə altına sala bilər. Bu cür su manipulyasiyası Hindistan və Pakistan arasında mövcud olan və uğurlu ikitərəfli su idarəçiliyinin nümunəsi sayılan İndus Sular Müqaviləsinin ruhuna ziddir. Suyu silaha çevirmək qeyri-etik olmaqla yanaşı, təhlükəlidir”. Qaiser Nawab hesab edir ki, beynəlxalq təşkilatlar bu zorakılığı qınamalı və dərhal atəşkəsin təmin olunmasına yardım etməlidir: “Biz tərəf seçməyə yox, sülhü seçməyə məcburuq. Beynəlxalq ictimaiyyətin susqunluğu daha ciddi pozuntular üçün cəsarət yaradır. Hələ gec deyil. Diplomatik əlaqələr – nə qədər çətin olsa da – davamlı yeganə həll yoludur. Gizli danışıqlar və etibarlı üçüncü tərəflərin neytral vasitəçiliyi bərpa olunmalı və dəstəklənməlidir. Eyni zamanda, vətəndaş cəmiyyəti təşkilatları, gənclər forumları və regional beyin mərkəzləri dialoqun qurulmasında gücləndirilməlidir. Əgər Hindistan bu bölgədə həqiqətən lider olmaq istəyirsə, o zaman yetkinlikdə, məsuliyyətdə və diplomatiyada da lider olmalıdır. Cənubi Asiya dünya əhalisinin beşdə birinə ev sahibliyi edir. Biz keçmişin əsiri ola bilmərik. Qarşılıqlı hörmət, hüququn aliliyi və ortaq inkişaf prinsiplərinə əsaslanan gələcəyi qəbul etməyin zamanı gəlib”.Gülbəniz Hüseynli / Metbuat.az
