.jpg)
"Məncə, Rusiya üçün geri dönmək üçün indi ən uyğun vaxt deyil. Xeyr, bu ən uyğunsuz zamandır. Biz bu imkanı əldən verdik, elə deyilmi?" - deyə Tramp qeyd edib. Bununla belə, o, Rusiyanın "Böyük səkkizlik"dən (G8) çıxarılmasını "çox axmaq qərar" adlandırıb. Trampın fikrincə, əgər Rusiya G8-də qalsaydı, nə Ukraynaya hücum edərdi, nə də "öldürücü müharibə" baş verərdi.
Xatırladaq ki, Tramp daha əvvəl də - 2020-ci ilin iyununda və 2024-cü ilin fevralında Rusiyanın G7-yə qaytarılmasını təklif etmişdi, lakin digər üzv ölkələr bu təşəbbüsü dəstəkləməmişdi. G7-yə ABŞ, Böyük Britaniya, Fransa, Almaniya, İtaliya, Kanada və Yaponiya daxildir. Rusiya isə 1997-ci ildə bu quruma qoşulmuş, lakin 2014-cü ildə Krımın ilhaqından sonra çıxarılmışdı. Trampın fikrincə, bu, Rusiyanın o vaxtkı ABŞ Prezidenti Barak Obamanı xarici siyasət sahəsində üstələməsi nəticəsində baş vermişdi.
Bu açıqlamalara cavab olaraq Kremlin sözçüsü Dmitri Peskov qeyd edib ki, Rusiya G7-yə qayıtmaqda maraqlı deyil. Onun sözlərinə görə, G7 artıq öz aktuallığını itirib və Rusiya daha çox "Böyük iyirmilik" (G20) ölkələri ilə əməkdaşlıqda maraqlıdır. Peskov bildirib ki, bu format qlobal iqtisadi artım mərkəzlərini daha dəqiq əks etdirir.
