İran Bəndər-Abbas şəhərindəki Şəhid Rəcai limanında baş verən partlayış nəticəsində ən azı 3 milyard dollardan 5 milyard dollara qədər itirib.
Yeniavaz.com İRNA agentliyinə istinadla xəbər verir ki, bu barədə İranın telekommunikasiya və informasiya texnologiyaları nazirinin müavini Məhəmməd-Möhsün Sədr məlumat verib.
Onun sözlərinə görə, dəymiş ziyanın miqyasına baxmayaraq, ölkə müasir texnologiyaların köməyi ilə hadisənin nəticələrini aradan qaldırmağa ümid edir.
Qeyd edək ki, aprelin 26-da İranın ən böyük limanlarından biri olan Şəhid Rəcai limanında güclü partlayış baş verib. Hadisə nəticəsində rəsmi məlumatlara görə 70-ə yaxın insan ölüb, 1200-ə yaxın insan yaralanıb.
Bəzi media orqanları partlayışın bərk raket yanacağında istifadə edilən natrium perxlorat maddəsinin düzgün saxlanmaması ilə bağlı baş verdiyini iddia etsə də, İran rəsmiləri bu məlumatları təkzib edir.
