"Reallıq budur ki, bu mövsüm bizim üçün qatar gedib".
Bu etirafın müəllifi Samir Abasovdur. Hansı ki, hələ "Neftçi"nin baş məşqçisi postuna təyin olunanda qatar çoxdan relsdən çıxmışdı və bilinirdi ki, sonda qəza qaçılmazdır. Roman Qriqorçukun 9 turluq işi tam fiaskoyla nəticələnmişdi. Klubun ötən yay ukraynalının bütün istək-arzularını yerinə yetirməsinə rəğmən. Heyətə 9 yeni transfer (Edvin Kuç, Emil Səfərov, Ramil Şeydayev, Robert Bauer, Andrey Ştoqrin, Rüstəm Samiqullin, Rafael Quzzo, Mustafa Sek, Dembo Darbo) cəlb olunmuşdu. Amma 9 transfer 9 turda bir qələbə belə qazana bilmədi və Qriqorçuk komandanı 9-cu yerdə təhvil verib getməli oldu.
Nəticədə "Neftçi" ötən mövsüm olduğu kimi, yenə avrokuboklardan kənarda qaldı. Bu gün əsas təzyiq baş məşqçiyə yönəlib. Amma görünən odur ki, rəhbərlik növbəti mövsümə Abasovla başlamaq niyyətindədir. Doğru qərardımı? Şübhəsiz! Niyələri sadalayaq...
Əməyə və...
Əlbəttə, ilk növbədə nəticə(sizlik) qabardılır. Amma müqayisə etsək, Samir Abasovun 24 oyunluq fəaliyyəti fiasko sayılmamalıdır. Ola bilsin, turnir cədvəlində 9-cu yerdən 6-cı pilləyə qədər məsafə mikraskopik irəliləyişdir. Bununla belə, ilk dövrədən sonra liderlə aradakı xal fərqinin 19-a, "üçlüy"ü qapayan rəqiblə 13-ə çatdığını nəzərə alsaq, çox şey itirilmişdi.
10-33-cü turların nəticəsini müqayisə etsək, Samir Abasovlu "Neftçi" 24 oyunda 8 qələbə, 8 heç-heçə, 8 məğlubiyyətlik göstərici ilə yadda qalıb. Qalan 3 turun nəticəsini hesablamasaq, 24 oyunda əldə olunan 32 xal bakılıları daha önə itələyir. Başqa sözlə, bu müddəti özündə əks etdirən turnir cədvəlinə əsasən "Neftçi" 4-cü yeri tutur, "Turan Tovuz" (31 xal) və "Sabah"ı (26 xal) qabaqlayır. Üstəlik, bir addım irəlidə olan "Araz-Naxçıvan"dan cəmi 3 xal geri qalır. Göründüyü kimi, Samir Abasovun nəticələri birmənalı uğursuz sayılmamalıdır.
Baxmayaraq ki, qış fasiləsində Abasovun əli elə də gücləndirilmədi. Mark Tamaş və Kilan Lebon kimi oyunçuların gedişinə əngəl ola bilməyən "Neftçi" mövsümün ikinci yarısı ərəfəsində cəmi 4 yeni transfer reallaşdıra bildi. Bu mənada Ryonosuke Ohori, Elvin Camalov, Bassala Sambu və Aleks Fernandesin transferi daha çox itkiləri sığortalamağa hesablanmışdı. Qriqorçukla Abasovun legioner hücumçuları isə müqayisəyəgəlməzdir. Ştoqrin 27, Darbo 16 oyunda hərəyə 3 qol vurubsa, Sambu 11 matçda artıq 4 dəfə rəqib torunu silkələməyi bacarıb. Şəraitdən danışırıqsa, Qəbələyə sığınan "Neftçi"nin qış fasiləsində bir yoxlama oyunu belə keçirə bilməməsi qeyd olunmalıdır.
...ənənəyə hörmət "Neftçi"dən,
Samir Abasov niyə növbəti mövsümdə də Bakı klubunda qalmalıdır? Əvvəla, o, "Neftçi"nin ruhuna bələddir. Bu klubda artıq bir dəfə özünü göstərmiş, çempion olmuş məşqçidir. Abasov yaxşı motivator, "Neftçi" isə əhval-ruhiyyə komandasıdır. Üstəlik, yerli mütəxəssisdir. Elə bu mövsümün medalçılarının böyük ölçüdə azərbaycanlı məşqçi olacağını nəzərə alsaq, Samir bəyə şans verilməsi ədalətli olar. "Neftçi"də müstəqillik dönəmində 9 çempionluğun hamısını elə yerli məşqçilər - Əhməd Ələsgərov (1), Kazbek Tuayev (3), Ağasəlim Mircavadov (1), Böyükağa Hacıyev (2), Arif Əsədov (1) və Samir Abasov (1) özü qazanıb. Odur ki, klubun ona bir köynək yaxın olan məşqçilərə güvənməsi qanunauyğundur.
...Abasova məsləhət bizdən...
"Neftçi"yə yox, Samir Abasova tövsiyyəmiz var. Mətbuat çox vaxt ona dəstək verib, çünki qeyri-adi açıqlamaları ilə oxucular üçün maraqlı persona olub. Amma bəzən, xüsusilə də son dönəmdə mətbuata, o cümlədən futbolçulara yönəlik fikirləri, replikaları xoş qarşılanmır, şəxsinə qarşı tənqid və təzyiqlərə rəvac verir. Adətən gənc məşqçilər belə atmaca ilə gündəmə gəlməyə çalışır. Uzağa getməyək, Vaqif Cavadov "Sumqayıt"da işə başlar-başlamaz ona-buna atmacaları ilə diqqət çəkdi, ancaq bunun ziyanına işlədiyini tez anladı və başını aşağı salıb komandası ilə məşğul oldu. Abasov xarakterindəki çılğınlığı yaşından irəli gələn müdrikliklə cilovlamağı bacarsa, təmkinli davransa, azarkeşlərlə mehriban olsa, mediaya münasibətdə adekvat davranmaqla "Neftçi"nin mətbuat xidmətindəki samballı həmkarlarımızı çətin situasiyada qoymayıb onları dinləsə, arxasında böyük bir ordu olduğunu hiss edəcək.
Mirağa
