ABŞ prezidenti Donald Tramp bazar günü sosial şəbəkələrdəki paylaşımları vasitəsilə ölməkdə olan Amerika kino sənayesini xilas etmək niyyətində olduğunu açıqlayıb.
Donald Tramp özünün “Truth Social” sosial şəbəkəsindəki filmlə bağlı paylaşımında deyib ki, Amerika kino sənayesi “çox sürətlə ölür”, çünki digər ölkələr insanları və studiyaları öz ölkələrindən uzaqlaşdırmağa çalışırlar.
"Birləşmiş Ştatlarda Hollivud və bir çox başqa ərazilər viran qalır. Bu, digər ölkələr tərəfindən koordinasiya edilmiş bir hərəkətdir və buna görə də milli təhlükəsizliyə təhdiddir", - Tramp Ticarət Departamentinə və ABŞ Ticarət Nümayəndəliyinin Ofisinə bütün xarici filmlərə 100 faizlik tariflərin tətbiqi "prosesinə dərhal başlamaq" üçün göstəriş verdiyini açıqlayıb.
Analitiklərin fikrincə, ABŞ-ın dünyada film istehsalı xərcləri və kassa gəlirlərində payı həqiqətən azalır, lakin ABŞ hələ də bu bazarda şəksiz lider olaraq qalır.
Amerika kino sənayesi artıq Trampın idxal rüsumlarından müəyyən qədər zərər çəkib: buna cavab olaraq Çin, digər məsələlərlə yanaşı, yayımında Amerika filmlərinin kvotasını azaltmaq qərarına gəlib.
"ABŞ hökumətinin Çinə qarşı tariflərdən sui-istifadə edərək yanlış hərəkətləri qaçılmaz olaraq yerli tamaşaçılarımızın ABŞ filmlərinə marağını azaldacaq, - Çinin film yayımı agentliyi bildirib. Biz bazarın qaydalarına əməl edəcəyik, tamaşaçı seçiminə hörmətlə yanaşacağıq və Amerikadan gətirilən filmlərin sayını orta dərəcədə azaldacağıq”.
Almaz Həsənli
