Tramp “NBC News” telekanalına müsahibəsində deyib ki, o, Kanadaya qarşı hərbi güc tətbiq etməyi planlaşdırmır, amma yenə də onu 51-ci dövlət kimi görmək istəyir. O, Kanadanın baş naziri Mark Karni ilə məsələni müzakirə etmək istəyir. Bununla belə, o, Qrenlandiya haqqında eyni şeyi deyə bilməz: "Düzünü desəm, Qrenlandiya ilə bağlı nəsə ola bilər. Bu, bizim milli və beynəlxalq təhlükəsizlik üçün lazımdır. Mən bunu Kanada ilə görmürəm. Sadəcə, görmürəm", - Tramp paylaşıb.
Jurnalistin aydınlaşdırıcı sualına cavab olaraq Tramp bildirib ki, Qrenlandiyaya qarşı hərbi güc tətbiqini istisna etmir.
"Mən bunu istisna etmirəm. Demirəm ki, bunu edəcəyəm, amma heç nəyi də istisna etmirəm. Qrenlandiya bizə çox lazımdır. Qrenlandiya bizim qayğısına qalacağımız çox az sayda insanlardır , biz onları və bütün bunları əziz tutacağıq. Amma beynəlxalq təhlükəsizlik üçün buna ehtiyacımız var", - Tramp deyib.
Xatırladaq ki, Tramp dəfələrlə Kanada və Qrenlandiyanın ABŞ-a qoşulması məsələsini gündəmə gətirib. Məsələn, dekabr ayında o, Kanada, Qrenlandiya və Panama kanalını xatırlatdığı bir yazı dərc etdi. Bundan sonra Danimarka kral gerbini dəyişdirərək, üzərində Qrenlandiya simvolunu aydın şəkildə vurğuladı. Mətbuatın yazdığına görə, Danimarka kralının bu qərarı bəzi tarixçiləri şoka salıb və Trampa irad kimi qiymətləndirilib.
“BBC” Rus Xidməti Qrenlandiyanın nə üçün vacib olduğu və Trampa nə üçün lazım olduğu barədə analitik məqalə dərc edib. Bildirilib ki, adada müasir yüksək texnologiyalı sənayelər üçün həyati əhəmiyyət kəsb edən faydalı qazıntılar var. Tramp NATO-nun baş katibi ilə görüşündə də bildirib ki, onun fikrincə, ABŞ Qrenlandiyanı ilhaq edəcək.
Almaz Həsənli
