Mənzil bazarında qiymət artımı davam edir. 2025-ci ilin I rübündə Azərbaycanda mənzil bazarında qiymətlər 2024-cü ilin I rübünə nisbətən 14.4 faiz bahalaşıb. Dövlət Statistika Komitəsinin məlumatına əsasən, bu ilin I rübündə əvvəlki illə müqayisədə ilkin mənzil bazarında qiymətlər 12.9 faiz, təkrar mənzil bazarında isə 14.4 faiz artıb. Qeyd edək ki, cari ilin I rübündə mənzil bazarında qiymət indeksi əvvəlki rüb ilə müqayisədə 4.4 faiz, o cümlədən ilkin mənzil bazarı üzrə 2 faiz, təkrar mənzil bazarı üzrə 4.5 faiz artıb.
“Azərbaycan Qiymətləndiricilər Cəmiyyəti” İctimai Birliyi isə Bakının 12 rayonundan 9-da mənzillərin qiymətləri ilə bağlı araşdırma aparıb. Qurumun sədri Vüqar Orucun sözlərinə görə, araşdırma zamanı paytaxtın ən tanınmış küçələrində yerləşən yeni və köhnə yaşayış binalarındakı mənzillərin 1 kvadrat metrinin satış qiymətləri toplanılaraq rayon üzrə orta qiymət hesablanıb. Eyni zamanda yeni və köhnə tikililər arasında qiymət fərqləri müəyyən edilib: “Nizami rayonunda yeni tikililərdə qiymət 2 780–3 025 manat, köhnətikililərdə qiymət 2 533–2 610 manat arasında dəyişir. Rayon üzrə orta qiymət 2 633 manat təşkil edir. Yeni və köhnə tikililər arasındakı qiymət fərqi 9–15 faiz intervalındadır. Xətai rayonunda yeni tikililərdə qiymət 2 020–3 408 manat, köhnə tikililərdə qiymət 1 806–3 050 manat arasında dəyişir. Rayon üzrə orta qiymət 2 467 manat təşkil edir. Yeni və köhnətikililər arasındakı qiymət fərqi 7–19 faiz intervalındadır. Yasamal rayonunda yenitikililərdə qiymət 2 205–3 985 manat, köhnətikililərdə qiymət 1 940–3 182 manat arasında dəyişir. Rayon üzrə orta qiymət 2 822 manat təşkil edir. Yeni və köhnə tikililər arasındakı qiymət fərqi 5–24 faiz intervalındadır. Nərimanov rayonunda yeni tikililərdə qiymət 2 517–3 980 manat, köhnə tikililərdə qiymət 2 312–3 250 manat arasında dəyişir. Rayon üzrə orta qiymət 3 006 manat təşkil edir. Yeni və köhnə tikililər arasındakı qiymət fərqi 3,4–16,5 faiz intervalındadır. Nəsimi rayonunda yeni tikililərdə qiymət 2 375–4 115 manat, köhnə tikililərdə qiymət 2 014–3 742 manat arasında dəyişir. Rayon üzrə orta qiymət 3 126 manat təşkil edir. Yeni və köhnətikililər arasındakı qiymət fərqi 3–45 faiz intervalındadır. Binəqədi rayonunda yenitikililərdə qiymət 2 583–2 941 manat, köhnə tikililərdə qiymət 1 536–2 710 manat arasında dəyişir. Rayon üzrə orta qiymət 2 563 manat təşkil edir. Yeni və köhnətikililər arasındakı qiymət fərqi 7–42 faiz intervalındadır. Suraxanı rayonunda yeni tikililərdə qiymət 1 752–2 230 manat, köhnə tikililərdə qiymət 1 420–1 995 manat arasında dəyişir. Rayon üzrə orta qiymət 1 836 manat təşkil edir. Yeni və köhnə tikililər arasındakı qiymət fərqi 10–23 faiz intervalındadır. Xəzər rayonunda yeni tikililərdə qiymət 1 930–2 195 manat, köhnə tikililərdə qiymət 1 635–1 845 manat arasında dəyişir. Rayon üzrə orta qiymət 1 913 manat təşkil edir. Yeni və köhnətikililər arasındakı qiymət fərqi 14–24 faiz intervalındadır. Sabunçu rayonunda yeni tikililərdə qiymət 2 120–2 562 manat, köhnə tikililərdə qiymət 1 875–2 239 manat arasında dəyişir. Rayon üzrə orta qiymət 2 226 manat təşkil edir. Yeni və köhnə tikililər arasında qiymət fərqi 10–17 faiz intervalındadır”.
Bazardakı bahalaşmaya gəlincə ekspert deyib ki, qiymətlərin inkişaf tendensiyası yalnız tələb və təklifdən asılı olmur: “Əslində, bu məsələyə kompleks şəkildə təsir göstərən amillər var. Təbii ki, bu sırada Rusiya-Ukrayna müharibəsi də var. Bu münaqişə daşınmaz əmlakın qiymətlərinə təsir göstərən amillərin içərisində birinci yerdə dayanır. Müharibə başlayandan sonra tikinti materiallarının idxalında bir sıra problemlər yarandı. İdxal problemləri tikinti materiallarının qiymətlərinə, dolayı yolla daşınmaz əmlak bazarına təsir göstərdi, yerli bazarlarda qiymətlər artdı. Tikintinin maya dəyəri yüksəldi. Bununla yanaşı, müharibə nəticəsində sahibkarların Ukraynanı tərk etməsi də əmlak bazarına təsir etdi. Həm Rusiyada, həm də Ukraynada bu bizneslə məşğul olan həmvətənlərimizin əksəriyyətinin Azərbaycana qayıtması və bizneslərini ölkəmizə daşıması da bu sahədə ajiotaja səbəb oldu. Onların gəlişi ilk növbədə kirayə bazarında artımlara səbəb oldu. Həm mənzil, həm də qeyri-yaşayış sahələrinin, obyektlərin qiymətləri yüksəldi. Digər tərəfdən, bu məsələdə pul amili də rol oynayır. Manatın alıcılıq qabiliyyətində dəyişikliklər var. Ona görə də mənzillərini satışa çıxaranlar –mülkiyyətçilər, rieltorlar son zamanlar daha yüksək qiymətlər təklif etməyə başlayıblar. Bundan başqa, Bakı şəhərinin 2040-cı ilədək inkişafına dair Baş planı mövcuddur ki, həmin plana görə artıq istismara yararsız binalar sökülərək yerlərində yeniləri tikilir. Bu da öz növbəsində söküntü ilə tikinti arasındakı fasilələrdə kirayə bazarını aktivləşdirir. Sökülən binaların sakinlərinə yeni mənzil almaq üçün verilən kompensasiyalar həm də alqı-satqı bazarında qiymətlərin dəyişməsinə də səbəb olur”.
Onun fikrincə, mənzillərin biznes alətinə çevrilməsi qiymət artımına yol açan amillərdən sayılır: “Daşınmaz əmlak hazırda çox ciddi biznes sahəsinə çevrilib. İnsanlar görürlər ki, Azərbaycanda, xüsusən də Bakı şəhərində daşınmaz əmlakın qiyməti ilbəil 15-20 faiz artır. Banklarda əmanətlərə dair gəlirlər 11, nadir hallarda 12 faizdir. Bankdan əldə olunan və dəyişməz gəlirdən vergi belə tutulur. Daşınmaz əmlakdan əldə olunan təbii artıma vergi tətbiq olunmur. Daşınmaz əmlak mövcud olan dövrdə kirayə və ya icarə də verilə bilir, bununla da sahibinə əlavə gəlir gətirir. Bu, Azərbaycanda stabil, dayanıqlı gəlir imkanlarına malik yeni biznes sahəsidir. Digər tərəfdən, Azərbaycanın iqtisadi inkişafı, 30 ildən artıq işğalda qalmış ərazilərimizin azad olunması ölkədə investisiya cazibədarlığını artırıb. Bunun da daşınmaz əmlaka bazarına müəyyən təsiri var”.
