Bu gün Ukrayna və Rusiya arasında əsirlərin mübadiləsinin üçüncü mərhələsi baş tutacaq.
APA xəbər verir ki, bu barədə Ukrayna prezidenti Volodimir Zelenski xalqa müraciətində bildirib.
O xatırladıb ki, mayın 24-də şənbə günü mübadilə davam edib və daha 307 əsgər vətənə qaytarılıb.
"Əsgərlər və çavuşlar. Əksəriyyəti Ukrayna Silahlı Qüvvələrinə məxsusdur. Həmçinin Milli Qvardiya və Dövlət Sərhəd Xidməti də var. Bu insanlardan 273-ü Donetsk vilayətində əsir düşüb. Onların əhəmiyyətli hissəsi isə hələ 2022-ci ildə Xerson, Zaporojye, Xarkov vilayətləri və Luganskda ələ keçiriliblər. İki gün ərzində baş tutan mübadilələr nəticəsində artıq 697 ukraynalı evə qayıdıb.", - Zelenski bildirib.
Onun sözlərinə görə, mübadilənin üçüncü mərhələsi mayın 25-də baş tutacaq və bu mərhələ çərçivəsində 1000 nəfər azad edilməlidir.
