“Google Play” xidmətlərinin beta versiyasında “Android” istifadəçilərini telefon fırıldaqçılarından qorumaq üçün nəzərdə tutulmuş təhlükəsizlik funksiyası aşkar edilib.
Yeniavaz.com xəbər verir ki, bu barədə “Android Authority” portalı məlumat yayıb.
“BankScamCallDetectionService” innovasiyası fırıldaqçıların qurbanları öz smartfon ekranının məzmununu, o cümlədən bank proqramlarında ödəniş detallarını göstərməyə inandırdığı halların qarşısını almağa kömək edəcək.
Fırıldaqçılar tez-tez özlərini bank işçisi kimi təqdim edərək, guya hesabınızla bağlı problemləri həll etmək üçün ekran paylaşma proqramı quraşdırmanızı xahiş edirlər. “Google”un yeni mexanizmi belə ssenariləri tanıya və istifadəçini potensial təhlükə barədə xəbərdar edə biləcək.
Funksiya üç amil üst-üstə düşəndə aktivləşdirilir: naməlum nömrədən gələn zəng, açıq bank proqramı və aktiv ekran paylaşımı. Bu kombinasiya aşkar edilərsə, ekranda mümkün saxtakarlıq barədə xəbərdarlıq görünəcək.
