BAKI,TurkicWorld
İngiltərə polisi, paytaxt Londonda müəyyən olunmamış bir hədəfə qarşı hücum planladığı şübhəsi ilə bir neçə İran vətəndaşının saxlanıldığını açıqlayıb.
TurkicWorld xəbər verir ki, saxlanılanlardan dördü İran vətəndaşıdır, beşinci şəxsin isə vətəndaşlığı hələ müəyyən edilməyib. Yaşları 29 ilə 46 arasında dəyişən şübhəlilərin polis idarələrində sorğuları davam edir, lakin hazırda onlara qarşı heç bir rəsmi ittiham irəli sürülməyib.
İngiltərə polisi bildirir ki, təhlükəsizlik qüvvələri Londra, Mançester və Svindonda bir neçə ünvanda axtarış aparır. Hücum planının konkret bir hədəfə yönəldiyi qeyd olunsa da, detallar “əməliyyat səbəblərinə görə” açıqlanmır.
Antiterror Komandanlığının rəhbəri Komandir Dominik Mörfi, polisin hazırda hücum planının arxasındakı motivasiyanı və ictimaiyyət üçün davam edən təhlükə olub-olmadığını müəyyənləşdirməyə çalışdığını bildirib.
Bundan əlavə, polisin açıqladığı ayrı bir istintaq çərçivəsində, 39, 44 və 55 yaşlarında olan üç İran vətəndaşı da Londonda milli təhlükəsizlik pozuntusuna dair şübhə ilə saxlanılıb. Bu şəxslərin cari hücum planı ilə əlaqələrinin olub-olmadığı hələlik açıqlanmayıb.
Hücum planı ilə İran dövləti arasında birbaşa əlaqə qurulmasa da, İngiltərənin daxili təhlükəsizlik xidməti MI5, Tehrana bağlı şəxslər və ya əməliyyatlar tərəfindən potensial təhdidlərin artdığını bildirib.
MI5 rəhbəri Ken McCallum, 2023-cü ilin oktyabrında verdiyi açıqlamada, təhlükəsizlik qurumlarının 2022-ci ildən bu yana İranla əlaqəli 20-dən çox "potensial ölümcül" planın qarşısını aldığını, bu planların əksəriyyətinin isə İngiltərədə yaşayan müxalif fiqurları hədəf aldığını açıqlayıb.
Xatırladaq ki, 2024-cü ilin mart ayında Fars dilində yayımlanan kanalda İran hakimiyyətini tənqid edən jurnalist Pouria Zeraati, Londondakı evinin önündə bıçaqlı hücuma məruz qalıb. Hadisədən sonra iki şübhəli şəxs Ruminyada saxlanılıb.
