İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyinin (TƏBİB) təşkilatçılığı ilə keçirilən media-tur zamanı Hemofiliyalı Xəstələrin Respublika Assosiasiyasının idarə heyətinin sədri Ayaz Hüseynov Pirallahı Tibb Mərkəzində yaradılan şəraitə yüksək qiymət verib və xəstələrə göstərilən diqqətə görə təşəkkürünü bildirib.
QHT.az xəbər verir ki, onun sözlərinə görə, əvvəllər qan laxtalanması problemi olan pasiyentlərin gündəlik həyatda fəal iştirakı mümkün deyildi. “Bu gün onlar rahatlıqla velosiped sürür, dərsə gedir, idmanla məşğul olur, hətta dövlət qurumlarında çalışırlar. Bu, dövlətin qayğısının nəticəsidir”, – deyə A.Hüseynov bildirib. O, Pirallahı Tibb Mərkəzinin direktoru Azər Zeynalovun təşəbbüsü ilə həyata keçirilən tədbirlərin xəstələr üçün motivasiya xarakteri daşıdığını qeyd edib və təşəkkürünü ifadə edib.
Bununla yanaşı, Ayaz Hüseynov hemofiliya xəstələrinin qarşılaşdığı vacib bir problemi gündəmə gətirib: dərman preparatlarının yalnız Bakı şəhərində verilməsi. O bildirib ki, 2024-cü ilə qədər regionlara da dərmanlar çatdırılırdı, lakin sonradan bu proses dayanıb:
“Regionlarda yaşayan pasiyentlər üçün dərmanların çatdırılması çox vacibdir. Bu xəstələr tam sağlam həyat yaşaya bilərlər, lakin dərman təminatında fasilələr onların sağlamlığına təhlükə yaradır. Xüsusilə də bu preparatların birbaşa xəstəxanalara verilməsi təmin edilməlidir. Səhiyyə Nazirliyi bu məsələyə diqqət yetirməlidir”, – deyə o vurğulayıb.
Assosiasiya rəhbəri həmçinin dövlət proqramı çərçivəsində görülən işləri yüksək qiymətləndirsə də, regionlarda dərman təminatının bərpasını zəruri sayıb və bu istiqamətdə dəstək göstərilməsini xahiş edib.
Pərvanə Fərhadqızı
QHT.az
