"Real Madrid"in sabiq yarımmüdafiəçisi Klarens Zeedorf İspaniya nəhənginin bu mövsüm hədəflərindən uzaq düşməsi barədə sualları cavablandırıb.
Fanat.Az xəbər verir ki, o, Rusiyanın "Çempionat" saytına danışıb:
"Xüsusi nəsə baş vermir. Həmişə qələbə qazanmaq olmaz. "Real" o qədər titul qazanıb! Karlo Ançelotti rekordlar qırmış mütəxəssisdir. Reallıq budur ki, bu mövsüm alınmır. Bəzən belə də olur. "Real" növbəti mövsümdə yenə titullar uğrunda mübarizə aparacaq.
Ançelotti gedir? Ola bilsin ki, onun dönəmi başa çatır. Amma qazandıqlarına görə bu mütəxəssisə hörmət etmək lazımdır. Ançelotti Çempionlar Liqası tarixinin ən yaxşı məşqçisidir. O, bu turniri hətta yenidənqurma dönəmində olan "Real"la da qazanıb. Təsəvvür edirsiniz? Mənə elə gəlir ki, insanlar başqalarının yıxılmasını izləməyi xoşlayırlar. Lakin fakt budur ki, heç bir komanda həmişə qələbə qazana bilməz. Bəlkə də "Real" rəhbərliyi yenilənməni vacib sayır. Olsun, ancaq bu belə, Ançelottinin böyüklüyünü kölgə altına salmır".
Nihat
