Yer fıstığı vitamin, mineral, protein və antioksidantlarla zəngin quru çərəzdir. Tərkibindəki bu faydalı maddələr sayəsində toxluq hissi yaradır, ürək-damar xəstəliklərinə qarşı qoruyucu rol oynayır və qan şəkərinin səviyyəsini tarazlaşdırmağa kömək edir. Yer fıstığı müxtəlif formalarda - qovrulmuş, duzlu, şokoladla örtülmüş və ya fıstıq əzməsi kimi istifadə oluna bilər. Bəziləri yer fıstığının qida dəyəri baxımından badam, qoz qədər faydalı olmadığını düşünsə də, bu məhsul yüksək dəyərə malik qida kimi qəbul edilir.
Pravda.az yer fıstığı ilə bağlı məlumatları təqdim edir:
Yer fıstığı tərkibində lif, protein və faydalı yağlar olan məhsuldur. Bu yağlar “yaxşı yağlar” kateqoriyasına daxildir və xolesterin səviyyəsinin aşağı salınmasına, ümumi sağlamlığın qorunmasına xidmət edir. Yer fıstığının tərkibində aşağıdakı faydalı maddələr var:
Maqnezium
Fol turşusu
E vitamini
Mis
Arginin
Yer fıstığının sağlamlığa faydaları:
Ürək xəstəlikləri riskini azaldır
Öd daşı əmələ gəlməsinin qarşısını ala bilər
Çəkiyə nəzarətə kömək edir
Hamiləlik dövründə vacib olan biotinlə zəngindir
Əzələlər, ürək və sinir sistemi üçün vacib olan tiamini ehtiva edir
Yaxşı protein mənbəyidir
Beyin inkişafını dəstəkləyir, dəriyə müsbət təsir göstərir
Xərçəng riskinin azalmasına dəstək olur
Yer fıstığı tərkibindəki təkli doymamış yağlar, protein və liflə xolesterini aşağı salır, damar divarlarını qoruyur, qanda laxtalanmanın qarşısını alır. Həmçinin yer fıstığının mütəmadi istifadəsi öd daşı riskini azalda bilər.
Protein baxımından zəngindir
Zülal baxımından zəngin olan yer fıstığı əzələ kütləsinin yaranmasına və sümük sağlamlığına faydalıdır. Fıstıq əzməsi xüsusilə idman öncəsi və sonrası qəlyanaltı olaraq istifadə olunur və yaraların tez sağalmasına da kömək edir.
Lifli quruluşu sayəsində arıqlamağa dəstək olur
Düzgün miqdarda istehlak edildikdə yer fıstığı arıqlamağa kömək edir. Protein tərkibi aclıq hormonunun (grelin) səviyyəsini azaldaraq toxluq hissi yaradır.
Kollagenlə zəngin olduğu üçün beyin və dəriyə faydalıdır
Yer fıstığının tərkibindəki resveratrol maddəsi bədəndə kollagen istehsalını artırır və bilişsel funksiyaları gücləndirir. Polifenollar isə əhval-ruhiyyəni yaxşılaşdırır və psixoloji pozğunluqların qarşısını alır.
Xərçəng riskini azalda bilər
Antioksidant təsiri olan yer fıstığı xərçəng riskini azaldır. Tərkibindəki E vitamini və protein böyüyən şişin qidalanmasını azalda bilər.
Yer fıstığı necə istifadə olunur?
Yer fıstığı çiy, qovrulmuş, qızardılmış, toz və ya əzmə şəklində istifadə oluna bilər.
Qabığı ilə birlikdə yeyildikdə daha faydalıdır.
İstifadə yolları:
Şirniyyat və peçenyelərə əlavə edilə bilər
Fıstıq əzməsi ilə içki hazırlamaq olar
Qatıq üzərinə səpmək
Salatlara əlavə etmək
Qızardıldıqdan sonra makaron və ya əriştəyə qatmaq
Yer fıstığının zərərləri varmı?
Yer fıstığı bəzi insanlarda allergiyaya səbəb ola bilər. Eyni zamanda yüksək kalorili olduğu üçün miqdarına diqqət edilməlidir. Çox istifadəsi çəki artımına səbəb ola bilər. Qovrulmuş və duzlu yer fıstığı çiy halına nisbətən daha az sağlam sayılır. Bundan əlavə, tərkibindəki fitik turşusu bəzi mineralların sorulmasını əngəlləyə bilər.
Əminə Bayramova
