Almaniyada yerləşən "Paul Daut GmbH & Co. KG" şirkəti "Penny" marketlərində satılan "Penny Ready ədviyyatlı və qızardılmış toyuq filesi" məhsulunu geri çağırıb.
Ölkə.az milli.az-a istinadla xəbər verir ki, qərar yoxlama zamanı bu məhsulda təhlükəli Listeria bakteriyası aşkarlanandan sonra verilib. Geri çağırılan məhsullar 250 qramlıq qablaşdırmadadır və üzərində 18-21 aprel 2025 tarixi yazılmış partiyaları əhatə edir. Digər tarixlər bu qərara daxil deyil.
Şirkət bildirib ki, bu məhsulu alanlar qəbz göstərmədən onu mağazaya qaytarıb pullarını geri ala bilərlər.
Listeria nədir?
Listeria bakteriyası orqanizmə düşəndə ürəkbulanma, qusma və ishala səbəb ola bilər. Bəzən isə yoluxma bir neçə həftə sonra özünü qripə oxşar əlamətlərlə göstərir. Bu infeksiya xüsusilə yaşlılar, uşaqlar, hamilə qadınlar və immun sistemi zəif olanlar üçün təhlükəlidir.
Xəstəlik bəzi hallarda ciddi fəsadlara - qan zəhərlənməsi və meningitə səbəb ola bilər. Hamilə qadınlarda isə bu infeksiya dölün itirilməsinə və ya erkən doğuşa gətirib çıxara bilər.
Mütəxəssislər xəbərdarlıq edirlər ki, bu məhsulu alanlar onu yeməməli, dərhal mağazaya qaytarmalıdır.
