Kiyev, 10 may, AZƏRTAC
Mayın 10-da müasir müstəqil Azərbaycanın memarı və qurucusu, xalqımızın dahi oğlu və Ümummilli Lideri Heydər Əliyevin anadan olmasının 102-ci ildönümü Ukraynanın paytaxtı Kiyevdə təntənəli şəkildə qeyd edilib.
AZƏRTAC xəbər verir ki, ilk öncə Azərbaycanın Ukraynadakı səfirliyinin və GUAM-ın Baş Katibliyinin, SOCAR-ın Ukraynadakı nümayəndəliyinin, ölkəmizin Xarkovdakı Fəxri Konsulluğunun kollektivləri, diaspor fəalları, soydaşlarımız Kiyevdəki Heydər Əliyev Parkında Ulu Öndərin abidəsini ziyarət edib, xatirəsini ehtiramla anıblar.
Sonra Kiyevdə bir neçə ay öncə salınan Azərbaycan-Ukrayna Dostluq Xiyabanında növbəti ağacəkmə aksiyası keçirilib.
Səfirliyimizin və Ukrayna Azərbaycanlıları Birləşmiş Diasporunun (UABD) birgə təşkilatçılığı ilə keçirilən ağacəkmə aksiyasından öncə Azərbaycan və Ukraynanın dostluğunu tərənnüm edən xatirə lövhəsinin açılışı olub.
Azərbaycanın Ukraynadakı səfiri Seymur Mərdəliyev bildirib ki, Ulu Öndər Heydər Əliyev dost Azərbaycan-Ukrayna münasibətlərinin banisi, müasir Azərbaycanın memarıdır.
“Bu gün Heydər Əliyev ideyaları əsasında dinamik inkişafda olan, qüdrəti və beynəlxalq nüfuzu getdikcə artan Azərbaycan yeni zirvələr fəth edir. Ulu Öndər Heydər Əliyevin layiqli davamçısı olan Prezident İlham Əliyevin uzaqgörən siyasəti, düşünülmüş islahatları və müdrik qərarları ilə Azərbaycanın inkişafında yeni mərhələ açılıb”, - deyə səfir bildirib.
S.Mərdəliyev Azərbaycanın ərazi bütövlüyünü bərpa etmiş, regional təhlükəsizliyi və əmin-amanlığı təşviq edən, qlobal layihələrin təşəbbüskarı və icraçısı olan qüdrətli dövlətə çevrildiyini vurğulayıb.
Ukrayna ətraf mühitinin mühafizəsi və təbii sərvətlər nazirinin müavini Sergey Vlasenko AZƏRTAC-a açıqlamasında göstərdiyi dəstəyə görə Azərbaycan dövlətinə təşəkkürünü bildirib.
“Kiyevdə milli parkın inkişafında göstərilən diqqətə görə Azərbaycan dövlətinə, səfirliyinə təşəkkür edirəm. Azərbaycan dövləti ətraf mühitə diqqəti COP29 konfransında da göstərdi. Azərbaycan Kiyevdə də ətraf mühitin inkişafı üçün xüsusi layihələr həyata keçirilir. Bu salınan park kiyevlilər üçün gözəl hədiyyədir. Burada insanlar idmanla məşğul oluacaqlar. Bir müddətdən sonra çiçəklənmiş ağacları görəcəyik, ekoloji vəziyyətin daha da yaxşılaşdırılmasını hiss edəcəyik. Biz burada valideynləri ilə birlikdə oynayan uşaqların sevincini görəcəyik. Bu aksiya gözəl başlanğıcdır, bu cür aksiyaları ancaq dəstəkləmək lazımdır”, - deyə o bildirib.
Qeyd edək ki, Kiyevin Dnepr çayının sağ sahilində salınan xiyabanda ilk dəfə ötən ilin dekabrında ağacəkmə aksiyası keçirilib.
Emil Hüseynli
AZƏRTAC-ın xüsusi müxbiri
Kiyev
