Rusiya Dəmir Yolları (RZD) hava nəqliyyatına qoyulan məhdudiyyətlər səbəbindən müxtəlif dəmir yolu marşrutlarına əlavə vaqonlar əlavə edib.
NOCOMMENT.az xarici KİV-ə istinadən xəbər verir ki, mayın 7-dən 12-dək sərnişinlərə əlavə 5000 yer təklif edilib.
“Hazırda Moskva-Sankt-Peterburq-Moskva, Adler-Moskva, Kazan-Moskva, Nijni Novqorod-Moskva və digər marşrutlar üzrə qatarların tərkibinə əlavə vaqonlar daxil edilib. Ümumilikdə, mayın 7-dən 12-dək sərnişinlərə əlavə 5000 yer təklif olunub”, – məlumatda deyilir.
Rusiya Dəmir Yolları daşıma tələbini yaxından izlədiklərini qeyd edib. Hazırda bilet qıtlığı yoxdur.
Rusiyanın bəzi hava limanları, o cümlədən paytaxtdakı hava limanları mayın 6 və 7-də təyyarələrin gəlişi və gedişi ilə bağlı müvəqqəti məhdudiyyətlər tətbiq edib. Nəticədə bəzi aviaşirkətlər planlaşdırılmış reysləri ləğv etmək, birləşdirmək və ya vaxtını dəyişdirmək məcburiyyətində olduqlarını bildiriblər. Onların arasında Aeroflot, Rossiya, Pobeda, S7 və Ural Hava Yolları var. Rusiya Nəqliyyat Nazirliyi əsas dəmir yolu marşrutlarında boş yerlərin olduğunu bildirdi; zərurət yaranarsa, Rosaviasiyanın tələbi ilə yerlərin sayı artırıla bilər.
