Bakı, 8 may, AZƏRTAC
Avropa İttifaqı Rusiyanın dondurulan aktivlərindən əldə olunan gəlirdən Ukraynaya bir milyard avroluq növbəti tranş köçürüb.
AZƏRTAC xəbər verir ki, bu barədə məlumat Avropa Komissiyasının saytında dərc olunub.
“Avropa Komissiyası Ukraynaya bir milyard avro həcmində müstəsna makromaliyyə yardımının dördüncü tranşını köçürüb. Brüssel bununla Ukraynanın ən böyük donoru kimi rolunu gücləndirib”, - deyə məlumatda bildirilir.
Qeyd edək ki, ilin əvvəlindən bəri Avropa Komissiyası tərəfindən Ukraynaya ayrılan kreditlərin ümumi həcmi altı milyard avroya çatıb. Brüssel gələcəkdə Kiyevə daha 12,1 milyard avro köçürməyi planlaşdırır.
İqtisadi məsələlər üzrə Avropa komissarı Valdis Dombrovskis Avropa İttifaqının Ukraynaya həm siyasi, həm maliyyə, həm də hərbi dəstəyini davam edəcəyini vurğulayıb.
