BAKI, TurkicWorld
Tramp Fars körfəzini “Ərəb körfəzi” adlandıracaq.
TurkicWorld xəbər verir ki, ABŞ-ın sabiq prezidenti Donald Trampın gələn həftə Səudiyyə Ərəbistanına planlaşdırılan səfəri zamanı beynəlxalq aləmdə “Fars körfəzi” kimi tanınan bölgəni “Ərəb körfəzi” və ya “Ərəbistan körfəzi” adlandıracağı gözlənilir.
Bu məsələ Körfəz regionunda və İranla münasibətlərdə yeni gərginlik yarada bilər.
Ağ Ev rəsmilərinin verdiyi məlumata görə, Tramp 13-16 may tarixlərində Səudiyyə Ərəbistanı, Qətər və BƏƏ-yə səfər edəcək və həmin səfər çərçivəsində Körfəzin adlandırılması ilə bağlı yeni açıqlama verəcək.
ABŞ ordusu uzun müddətdir bölgəni “Ərəb körfəzi” olaraq adlandırsa da, bu ifadə xüsusilə İran tərəfindən sərt tənqid olunur. Belə ki, dünya xəritələrinin əksəriyyətində bu su hövzəsi “Fars körfəzi” olaraq qeyd edilir. Lakin bəzi ərəb dövlətləri və regional qurumlar onu “Ərəb körfəzi” adlandırmaqda israr edir.
İran prezidenti Həsən Ruhani 2017-ci ildə Trampın bu ifadəni işlətməsinə cavab olaraq onu “coğrafiya oxumağa” çağırmış, sabiq xarici işlər naziri Məhəmməd Cavad Zərif isə “Trampın coğrafiyası da satılıb” ifadəsini işlətmişdi.
Bundan əvvəl, Tramp bu il yanvarın 20-də “Meksika körfəzi”nin adının “Amerika körfəzi” olaraq dəyişdirilməsini nəzərdə tutan sərəncam imzalamışdı. O, bu addımı “Amerika dəyərlərinin bərpası” kimi əsaslandırmışdı.
Qeyd edək ki, Fars körfəzi bölgəsi təkcə adlandırma ilə deyil, həm də strateji enerji resursları və geosiyasi əhəmiyyəti ilə region və dünya gücləri arasında mübahisə mövzusu olaraq qalır.
