ABŞ Federal Ehtiyatlar Sisteminin (FED) bugün faiz dərəcəsi ilə bağlı keçiriləcək toplantısı öncəsi dollar major valyutalar qarşısında bir qədər ucuzlaşıb. EUR/USD valyuta cütlüyü 1.13800 səviyyəsindən 1.13250 səviyyəsinə qədər dəyər itirdiksən sonra yenidən bahalaşaraq 1.13700 səviyyəsinə qədər yüksəlib.
Eyni dövr ərzində GBP/USD cütlüyü 1.33330 həddindən 1.33620 həddinə qədər bahalaşıb. Qızılın qiyməti 22 aprel tarixindən bəri ilk dəfə 3434$ səviyyəsinə qədər artım sərgiləyib. Neft isə cari həftənin əvvəlində itirdiyi mövqelərini bərpa edib və artıq 62.60$ səviyyəsində ticarət olunur.
Ötən gün ABŞ-ın Ticarət Nazirliyinin dərc etdiyi məlumata əsasən, 2025-ci ilin mart ayında ölkənin Ticarət Saldosunun kəsiri fevral ayı ilə müqayisədə 14% artaraq 140.5 milyard dollar səviyyəsinə çatıb. Qeyd olunan nəticə göstərici üçün rekord həddir. Mart ayında Amerikanın ixracı 278.5 milyard dollar, idxalı isə 419 milyard dollar təşkil edib.
Həmçinin, Avrozonanın Sənaye və Xidmət Sektorlarında Kompozit Biznes Aktivliyi İndeksi (PMI) mart ayı ilə müqayisədə aprel ayında 50.9 bənd səviyyəsindən 50.4 bənd səviyyəsinə qədər geriləyib. Birliyin xidmət sektorunda PMI aprel ayında 51 bənddən 50.1 bəndədək enib. Eləcə də, Avropa İttifaqının ən böyük iqtisadiyyatı olan Almaniyanın Xidmət Sektorlarunda Biznes Aktivliyi İndeksi 50.9 bənddən 49 bəndədək enib. Böyük Britaniyanın xidmət sektorunda PMI isə 52.5 bənddən 49 bəndədək zəifləyib.
Bugün bazar iştirakçıları Bakı vaxtı ilə saat 22:00-da FED tərəfindən açıqlanacaq faiz qərarını diqqətlə izləyəcəklər. Əlavə olaraq, Almaniyada dərc olunacaq Sənaye Sektorunda Fabrik Sifarişlərinin Həcmi və ABŞ-da açıqlanacaq kommersiya məqsədli neft ehtiyatları göstəriciləri investorların maraqla gözlədikləri xəbərlərdir.
Məlumat İnvest-AZ İnvestisiya Şirkətinin analitikləri tərəfindən hazırlanıb.
