Dünyanın ən məşhur mesajlaşma proqramı olan “WhatsApp” mütəmadi olaraq yeni funksiyaları sınaqdan keçirir. Təbii ki, hər bir tətbiq kimi, “WhatsApp”ın ən çox diqqət yetirdiyi sahə süni intellektdir.
İndex.az xəbər verir ki, “WhatsApp”, istifadəçilərin çox bəyənəcəyi söhbət divar kağızları ilə bağlı süni intellekt funksiyasını sınaqdan keçirməyə başlayıb.
Bu funksiya “WABetaInfo” tərəfindən tətbiqin “Android” versiyasının ən son beta-versiyasında qeyd edilib.
Yuxarıdakı skrinşotdan da göründüyü kimi, istifadəçilər tezliklə “WhatsApp”dan birbaşa süni intellektdən istifadə edərək söhbətlər üçün divar kağızları yarada biləcəklər. Təbii ki, digər xüsusiyyətlər kimi burada da “Meta”nın süni intellekt vasitəsi olan “Meta AI”dan istifadə olunacaq. Yaradılan şəkillər birbaşa divar kağızı kimi təyin olunmaq üçün uyğun ölçülərdə olacaq.
“WABetaInfo”ya görə, daha diqqət çəkəni, süni intellektlə yaradılan bu divar kağızlarının söhbətlərə xas olması ehtimalıdır. Bu o deməkdir ki, istədiyiniz kimi müxtəlif divar kağızları yarada bilərsiniz. Əlavə edək ki, süni intellektlə divar kağızlarının yaradılması funksiyasından birbaşa parametrlərdəki “Söhbət mövzuları” bölməsindən istifadə etmək olar. İstəyirsinizsə, hazır təkliflər arasından seçim edə bilərsiniz və ya birbaşa mətn əmrləri ilə sıfırdan vizual yarada bilərsiniz.
İstifadəçilərə daha çox fərdiləşdirilmiş təcrübə təqdim edəcək və mesajlaşma təcrübəsini artıracaq bu xüsusiyyət hazırda sınaq mərhələsindədir. Təəssüf ki, nə vaxt geniş yayılacağı ilə bağlı məlumat yoxdur.
