"Amazon"un pilotsuz taksi şirkəti olan "Zoox" Las Veqasda baş vermiş qəzanın ardından proqram təminatını könüllü şəkildə geri çağırıb.
Valyuta.az xəbər verir ki, şirkətin çərşənbə axşamı yaydığı açıqlamaya görə, insident zamanı içərisində sərnişin olmayan robotaksi Las Veqasda bir sərnişin avtomobili ilə toqquşub. “Xəsarət alan olmayıb, hər iki nəqliyyat vasitəsinə isə yalnız yüngül ziyan dəyib.
Məlumata görə, qəza sərnişin avtomobilinin robotaksinin hərəkət etdiyi zolağa yaxınlaşması ilə baş verib. "Zoox"un sözlərinə görə, robotaksi avtomobilin irəliləyəcəyini güman edərək sağa dönüb və əyləci sıxıb. Lakin sərnişin avtomobili tam dayanaraq yol verib və nəticədə toqquşma qaçılmaz olub.
Şirkət qəzanın səbəbini müəyyən etdiyini, proqram təminatını yenilədiyini və hazırda yollarda olan bütün nəqliyyat vasitələrinin bu yeniləmə ilə təchiz olunduğunu bildirib.
Xatırladaq ki, "Amazon" 2020-ci ildə "Zoox"u 1,2 milyard dollara alıb. 2014-cü ildə qurulan şirkət Las Veqasda fəaliyyət göstərir və San-Fransisko, Ostin və Mayami şəhərlərinə genişlənməyi planlaşdırır. "Zoox"un robotaksiləri sükan, pedal və sürücü oturacağı olmayan, kabin formasında dizayn edilib və bu xüsusiyyəti ilə "Waymo"dan fərqlənir.
Sərvanə Rəmixanova
