Mayın 22-dən 24-dək Düşənbədə Tacikistan tarixində ilk dəfə sağlamlıq və gözəllik sahəsinə həsr olunmuş ixtisaslaşdırılmış sərgi keçiriləcək.
Hata.az-ın yazdığına görə, Tacikistan Ticarət və Sənaye Palatası tərəfindən təşkil olunacaq sərgi əczaçılıq, kosmetologiya, bədənə qulluq, sağlam həyat tərzi, idman və tibb sahələrində aparıcı istehsalçıları, distribyutorları və mütəxəssisləri bir araya gətirəcək.
Ziyarətçilərə əczaçılıq və kosmetika sənayesindən yeni məhsullar, dəri və saça qulluq məhsulları, sağlam qida məhsulları, idman avadanlıqları, fitnes xidmətləri və tibb müəssisələrinin təklifləri təqdim olunacaq.
Sərginin ziyarətçiləri sağlamlıq və gözəllik sahəsində ən son tendensiyalar haqqında məlumat əldə edə, sənaye ekspertlərindən məsləhətlər ala, tematik ustad dərslərində, təqdimatlarda və məhsul nümayişlərində iştirak edə biləcəklər. Bundan əlavə, bir sıra iştirakçılar öz məhsul və xidmətlərinə xüsusi endirimlər təqdim edəcəklər.
Məlumata əsasən, artıq Hindistan, İran, Çin, Pakistan, Polşa, Qazaxıstan, Özbəkistan şirkət və brendləri, həmçinin Tacikistandan olan nümayəndələr sərgidə iştirak edəcəklərini təsdiqləyiblər.
Tədbir təcrübə mübadiləsi, işgüzar əlaqələrin qurulması və beynəlxalq əməkdaşlığın genişləndirilməsi üçün unikal platformaya çevriləcək. Təşkilatçılar bütün maraqlı şirkətləri və mütəxəssisləri sağlamlıq və gözəllik sahəsində canlı tədbirdə iştirak etməyə dəvət ediblər.
