BAKI, TurkicWorld
KAAN döyüş təyyarəsinin yeni prototipləri bu il uçuşa başlayacaq.
TurkicWorld xəbər verir ki, TUSAŞ-ın baş direktoru Mehmet Demiroğlu yerli və milli istehsal olan KAAN döyüş təyyarəsinin iki yeni prototipinin montaj mərhələsində olduğunu və bu il ərzində uçuşlara başlayacağını açıqlayıb.
TEKNOFEST-in Şimali Kiprdə ziyarətçilərin üzünə açıldığı tədbirdə çıxış edən Demiroğlu bildirib ki, biri bu ilin sonunda, digəri isə gələn ilin əvvəlində uçuşlara hazır olacaq. O qeyd edib ki, KAAN layihəsi Türkiyənin qürur layihələrindən biridir və hazırda yüksək sürətlə həyata keçirilir. 2028-ci ildən etibarən Hərbi Hava Qüvvələrinə təyyarələrin çatdırılması planlaşdırılır.
Demiroğlu həmçinin ANKA-3 pilotsuz uçuş aparatının və HÜRJET təlim-təyyarəsinin də seriyalı istehsal mərhələsinə keçdiyini, bu layihələrin gələn il tədarükə hazır olacağını bildirib. O, HÜRJET-in artıq 200 uçuş testindən keçdiyini və kütləvi istehsalın başlandığını da vurğulayıb.
Qeyd edək ki, KAAN beşinci nəsil döyüş təyyarəsi layihəsi olaraq Türkiyənin milli müdafiə texnologiyalarında strateji sıçrayışını təmsil edir və TUSAŞ (Türk Aviasiya və Kosmos Sənayesi A.Ş.) tərəfindən inkişaf etdirilir.
