Bakı ilə Tehran arasında münasibətlərin yaxşılaşması həm Cənubi Qafqaz regionunda, həm də ondan kənarda regional təhlükəsizliyin möhkəmləndirilməsi üçün böyük perspektivlər açır.
Bunu “Report”a açıqlamasında pakistanlı politoloq Bəsim Rza deyib.
Onun sözlərinə görə, bu, regional oyunçular arasında gərginliyi azaltmağa kömək edə bilər.
Politoloq qeyd edib ki, Tehranın Azərbaycanın ərazi bütövlüyünü təsdiqləməsi və Bakının İranla diplomatik qarşılıqlı fəaliyyətə hazır olması tərəflərin bir-birinə yaxınlaşmasına və əməkdaşlığa əsaslanan təhlükəsizliyin möhkəmləndirilməsinə dəlalət edir.
“Bu ikitərəfli mövqe sərhəd nəzarəti, terrorizmlə mübarizə və silah qaçaqmalçılığı və ekstremistlərin sızması kimi transmilli təhlükələrlə mübarizədə koordinasiyanın artırılmasına gətirib çıxara bilər”, - Rza vurğulayıb.
Ekspertin fikrincə, İran-Azərbaycan münasibətlərinin gələcəkdə daha da yaxşılaşması Cənubi Qafqazda sabitləşdirici qüvvəyə çevrilərək bütün qonşu dövlətlər, o cümlədən Türkiyə, Ermənistan və Rusiya arasında əməkdaşlıq üçün əlverişli atmosferin yaradılmasına kömək edə bilər.
“Belə canlanma uzun müddətdir davam edən mübahisələrin həllinə kömək edə bilər, münaqişədən sonrakı yenidənqurmaya dəstək verə bilər və Zəngəzur dəhlizi kimi infrastruktur layihələri üzrə hərtərəfli dialoqu asanlaşdıra bilər”, - deyə o, fikrini yekunlaşdırıb.
