Onun haqqında ilk dəfə şair dostum Səlim Babullaoğlunun dilindən eşitmişəm. Səlim bəyin söylədiyinə görə, çox dəyərli ziyalılardan biri - şərqşünas alim və tərcüməçidir. Hər dəfə də ondan danışanda yüksək fikirdə olduğunu deyib, yaradıcılığından nümunələr gətirib. Mən elə bilirdim ki, ahıl adamdır, amma sən demə, bu gün hələ 62 yaşı tamam olur…
Araşdırarkən tənqidçi-ədəbiyyatşünas Qurban Bayramovun onun haqqında yazısına rast gəldim. Hörmətli Qurban bəy yazır: “Məsiağa Məhəmmədi klassik və müasir farsdilli ədəbiyyatı araşdırmaqla yanaşı, həm də onun tərcüməsi, təbliği və tənqidi ilə məşğuldur və bu sahədə onun fəaliyyəti elmi-ədəbi ictimaiyyətə yaxşı tanışdır. Onun bir kitabında Şəhriyarın “Heydərbabaya salam” poemasının fars dilinə İranda çap olunmuş tərcüməsi haqqında rəyi, eləcə də Şəhriyarın iri həcmli bir şeirinin farscadan dilimizə tərcüməsi yer alıb. Böyük Mövlanaya həsr edilmiş bu şeir Şəhriyarın bədii təxəyyülünün qüdrətini və özünəməxsusluğunu göstərmək baxımından çox maraqlıdır. Məsiağa bədii mətnlərə öz akademik yanaşmasına uyğun olaraq, həmin şeiri filoloji tərcümə edib. Bildiyim qədəri, onun tərcüməsi əsasında bu şeirin iki müxtəlif poetik tərcüməsi də meydana çıxıb və dövri mətbuatda işıq üzü görüb”.
Xalq inancına güvənsək, may ayı baharın sonuncu ayı sayılır. Bu ayda doğulan bir sıra böyük şəxsiyyətlərin- XVIII əsrdə Şotlyandada yaşayan- faktorialların hesablanması üçün sonralar onun adını daşıyan düsturu quran riyaziyyatçı alim Ceyms Stirlinqin, XIX əsrdə ABŞ-da yaşayan- hazır qəhvə hazırlama üsulunu ixtira edən iş adamı Corc Konstant Luis Vaşinqtonun, XX əsrdə Everestin zirvəsini fəth edən ilk iki alpinisdən biri - 20-ci əsrin ən təsirli şəxsləri siyahısına daxil edilən Tensinq Norgeyin və digər bənzərsiz şəxsiyyətlərin adlarını sadalamaq olar. Ümumiyyətlə, may ayı ilin ən gözəl aylarından biridir…
Haqqında söhbət açdığım Məsiağa Məhəmmədi də 1963-cü ilin may ayının 1-də indiki Şirvan şəhərində dünyaya gəlib. Azərbaycan Dövlət Universitetinin Şərqşünaslıq fakültəsini fərqlənmə diplomu ilə bitirib. 1985–1987-ci illərdə Əfqanıstanda tərcüməçi kimi hərbi xidmətdə olub. 1987-ci ildən etibarən Azərbaycan Milli Elmlər Akademiyası Ziya Bünyadov adına Şərqşünaslıq İnstitutunda laborant, kiçik elmi işçi, böyük elmi işçi, bölmə müdiri, direktor müavini vəzifələrində çalışıb.
1993–1994-cü illərdə indiki Heydər Əliyev adına Azərbaycan Ali Hərbi Məktəbinin xarici dillər kafedrasının dosenti olub. 2003–2004-cü illərdə Nizami Gəncəvi adına Milli Azərbaycan Ədəbiyyatı Muzeyində elmi işlər üzrə direktor müavini işləyib. 2004-cü ildən 2022-ci ilə qədər AMEA-nın Şərqşünaslıq İnstitutunda İran filologiyası şöbəsinin müdiri vəzifəsində çalışıb.
2011–2019-cu illərdə Azərbaycan Respublikasının Prezidenti yanında Strateji Araşdırmalar Mərkəzinin İran üzrə eksperti olub. 2019-cu ildən Beynəlxalq Münasibətlərin Təhlili Mərkəzinin baş məsləhətçisidir. Ona yaxın elmi, beş trcümə kitablarının müəllifidir. Altı kitabın isə tərtib edənidir.
2013-cü ildə haqqında “Məsiağa Məhəmmədi- 50” adlı kitab nəşr olunub. Xidmətləri bir neçə medala layiq görülüb. 1991-ci ildə şərqşünas, professor Rüstəm Əliyevin rəhbərliyi altında "Saib Təbrizinin lirikası və farsdilli poeziyada "hind üslubu" problemi" mövzusunda dissertasiya müdafiə edərək filologiya üzrə fəlsəfə doktoru alimlik dərəcəsi alıb...
Dostu, filologiya elmləri doktoru Cavanşir Yusifli isə onu belə təqdim edir: “Məsiağa, Məsiağa Məhəmmədi, Məsiağa müəllim, görkəmli şərqşünas, alim, tərcüməçi... hər şeyi ideal dəqiqliklə yerində deyə bilən adam...”
Bir sözlə, dostumun dostu Məsiağa Məhəmmədinin bu gün ad günüdür, 62 yaşı tamam olur. Ona möhkəm can sağlığı, elmi uğurlar arzulayıram.
Çox yaşasın!
Hörmətlə, Elman Eldaroğlu
