"Beynəlxalq Valyuta Fondu"nun (BVF) çərşənbə günü açıqladığı məlumata görə, Yaxın Şərq və Şimali Afrika (MENA) ölkələri tarif tədbirləri, aşağı neft qiymətləri və maliyyə yardımının azalması səbəbindən iqtisadi qeyri-müəyyənliklərlə üzləşərək ciddi iqtisadi çətinliklər yaşayır.
BVF-nin MENA regionu üzrə regional icmal hesabatında bildirilir ki, 2022-ci ildə bir bareli 120 dolları keçən "Brent" markalı xam neftin qiyməti hazırda aşağı səviyyədədir və 2025–2026-cı illərdə bir barel üçün 65–69 dollar civarında olacağı proqnozlaşdırılır. Bu isə enerji ixrac edən ölkələri bazar dəyişkənliyinə qarşı daha həssas edir, Valyuta.Az xəbər verir.
BVF-nin Yaxın Şərq və Mərkəzi Asiya üzrə direktoru Cihad Əzurun (Jihad Azour) sözlərinə görə, ABŞ və digər ölkələrin tarif planları, həmçinin geosiyasi gərginliklər ümumdünya iqtisadi qeyri-müəyyənliyini artırır və bu da regionun iqtisadiyyatına mənfi təsir edərək artım tempini 2%-dən 4.5%-ə qədər azalda bilər.
“Bu səbəbdən ölkələr dərhal reaksiya göstərməli və öz iqtisadiyyatlarını qorumaq üçün siyasətlər müəyyənləşdirməlidir”, — Əzur Dubayda verdiyi müsahibədə bildirib.
Əzur əlavə edib ki, bölgəyə yönələn xarici maliyyə yardımının azalması da önəmli rol oynayacaq. ABŞ Prezidenti Donald Trampın (Donald Trump) ölkəsinin dünyada ən böyük donor mövqeyindən geri çəkilməsi nəticəsində yardım axını zəifləyib.
“Beynəlxalq yardımın, xüsusilə də böhran vəziyyətində olan ölkələr üçün azalması region üçün yeni risklər yaradır”, — Əzur deyib.
Əzurun sözlərinə görə, MENA regionunda iqtisadi artım bu il 2.6% səviyyəsində gözlənilir, halbuki bu göstərici ötən il 1.8% idi. Lakin qlobal qeyri-müəyyənliklər proqnozlara təsir edə bilər.
Pandemiyadan sonra Fars körfəzi ölkələri xarici birbaşa investisiyaları cəlb etməkdə davam edir və ÜDM-in təxminən 2%-i həcmində artım qeydə alınıb. Digər MENA ölkələri isə daha zəif investisiya axını ilə üzləşir.
BVF bəzi çətinliklə üzləşən ölkələrlə və Suriyadakı yeni hökumətlə əməkdaşlığa hazır olduğunu bildirib. Əzur qeyd edib ki, BVF-nin əməkdaşları ilə Livan rəsmiləri arasında da danışıqlar aparılır.
“Suriyanın bərpası uzunmüddətli bir proses olacaq və bu, regional və beynəlxalq dəstəyin səfərbər edilməsini, həmçinin institutların qurulması, iqtisadi islahatlar və infrastruktur, qaçqınlar, sosial müqavilənin yenilənməsi kimi əsas məsələlərin həllini tələb edəcək”, — Əzur əlavə edib.
Hesabatda vurğulanır ki, qlobal iqtisadi qeyri-müəyyənliyə baxmayaraq, MENA ölkələri struktur islahatları və iqtisadi əlaqələrin şaxələndirilməsi yolu ilə artımı təşviq edə bilərlər.
Aydın
BVF, Yaxın Şərq iqtisadiyyatı, MENA regionu, neft qiymətləri, iqtisadi qeyri-müəyyənlik, xarici investisiya, Donald Tramp, Cihad Əzur, Suriyanın bərpası
